"გაერთიანებული დემოკრატიული მოძრაობის" ლიდერი ნინო ბურჯანაძე "რეზონანსთან" საუბრისას "პატრიოტთა ალიანსთან" გაერთიანებას გამორიცხავს. ბურჯანაძე ხაზგასმით აცხადებს, რომ ინაშვილთან ამ თემაზე საერთოდ არ უსაუბრია.

ამბობს, რომ გაერთიანების საკითხზე ამ ეტაპზე არავისთან საუბრობენ და პარტია რეგიონული ოფისების გაძლიერების საკითხზე მუშაობს. ბურჯანაძე მომავალში არ გამორიცხავს, რომ ამ თემაზე ვინმესთან მოლაპარაკება გაააქტიურონ, თუმცა დასძენს, რომ დღეის მონაცემებით ამის პერსპექტივა არ ჩანს.

ნინო ბურჯანაძემ "რეზონანსთან" ქართულ-რუსულ ურთიერთობაზეც ისაუბრა. მისი აზრით, საქართველოს ხელისუფლების ლიდერებს რუსეთთან პირდაპირი საუბარი რომ ჰქონოდათ, გრიგორი კარასინი არ იტყოდა იმას, რომ საქართველო უახლოეს წლებში დე-ფაქტო აფხაზეთისა და ოსეთის დამოუკიდებლობას აღიარებს.

"დემოკრატიული მოძრაობის" ლიდერის შეფასებით, აბაშიძის განცხადება გონივრული იყო, როდესაც მან თქვა, რომ საქართველო დღეს და ხვალ ნატოს წევრი ვერ გახდება. ფრანსუა ოლანდის განცხადებაც იმის დემონსტრირება იყო, რომ საქართველო უახლოესი ათწლეულების განმავლობაში ალიანსის წევრი ვერ გახდება.

"რეზონანსი": მედიაში გავრცელდა ცნობა, თითქოს და თქვენ და ირმა ინაშვილის "პატრიოტთა ალიანსი" ერთიანდებით და ირმა ინაშვილთან უკვე გქონდათ კულუარული მოლაპარაკება. ამ ინფორმაციას ადასტურებთ?

ნინო ბურჯანაძე: არავითარი კულუარული მოლაპარაკება არ მაქვს. ჩვენ ახლა პარტიული სტრუქტურის გაძლიერებაზე ვმუშაობთ. მას ვაძლიერებთ რეგიონებში. წინა არჩევნებზე მიღებულ შედეგზეც გავაკეთეთ სერიოზული ანალიზი. მართალია, შედეგს არ ვეთანხმებით, მაგრამ იმასაც ვამბობთ, რომ ეს მხოლოდ ხელისუფლებისა და "ნაცმოძრაობის" გარიგების ბრალი არ არის. ახლა სერიოზულად ვემზადებით არჩევნებისთვის.

მოლაპარაკებას არც ერთ ნორმალურ ოპოზიციასთან არ გამოვრიცხავთ, მაგრამ არავისთან გაერთიანებას დღეის მდგომარეობით არც ვაპირებთ და ვერც ვხედავ ამის შესაძლებლობას, თუმცა პოლიტიკა იცვლება და გადაჭრით ვერაფერს გეტყვით, მაგრამ ახლა ამაზე არავისთან არ გვქონია საუბარი.

"რ": შესაძლო ალიანსის შექმნაზე ირმა ინაშვილთან საერთოდ არ გისაუბრიათ?

ნ.ბ: ამ თემაზე მათთან ნამდვილად არ გვისაუბრია.

"რ": რაც შეეხება სხვა პარტნიორებს, რომელთანაც კოალიცია თვითმმართველობის არჩევნებზე შექმენით, ისევ ერთად აპირებთ პოლიტიკურ ბრძოლას?

ნ.ბ: ქდმ არ არის ჩვენი პარტნიორი, ამ პარტიამ განიცადა რეორგანიზაცია. პარტიის ის ლიდერები და აქტიური წევრები, რომლებსაც მართლა უნდოდათ ხელისუფლებასთან ოპონირება, ჩვენს პარტიას შემოუერთდნენ და ერთად ვიბრძვით.

რაც შეეხება "მემარცხენე ალიანსსა" და ჯონდი ბაღათურიას "ქართულ დასს", ისინი ჩვენი წევრები არ არიან, მაგრამ მათთან გვაქვს ინტენსიური კონსულტაცია. თუმცა ისინი დამოუკიდებლად მუშაობენ და საკუთარი პარტიების გაძლიერებას ცდილობენ. ის ერთობა, რომელიც თვითმმართველობის არჩევნებისთვის შეიქმნა, არ დაშლილა და მუშაობა მათთან ერთად გრძელდება.

"რ": ხომ არ აპირებთ კიდევ ვინმესთან მოლაპარაკების წამოწყებას?

ნ.ბ: ამ წუთას არავისთან არ გვაქვს წინასაარჩევნო კონსულტაციები და არც გეგმაში არ გვაქვს. ერთადერთი, რაზეც კონსულტაციები მიმდინარეობს, ეს არის საარჩევნო გარემოსთან დაკავშირებული საკითხები. თუმცა ხელისუფლების მხრიდან არ ჩანს სურვილი, რომ რეალურად რაიმე შეიცვალოს.

"რ": კახა კუკავა ხელისუფლებასთან ალიანსში გადანაშაულებთ, არ აპირებთ მას უპასუხოთ?

ნ.ბ: ქართულ პოლიტიკურ ელიტაში კაცებმა რომ საკუთარი სიტყვის ფასი არ იციან, ეს დიდი ხანია ვიცი, ეს ჩვეულებრივ მოვლენად იქცა. კუკავამ თქვა, რომ პოლიტიკიდან წავიდა. თუ მობრუნდა, ესეც უნდა აუხსნას საზოგადოებას, ან რატომ წავიდა, ან რატომ მობრუნდა. თუ პოლიტიკიდან წასულია, მაშინ მის განცხადებებზე კომენტარს არ გავაკეთებ. კერძო პირის განცხადებებს რატომ უნდა ვუპასუხო?!

"რ": აბაშიძე-კარასინის ბოლო შეხვედრას საქართველოში დიდი ვნებათაღელვა მოჰყვა. თქვენი აზრით, ზურაბ აბაშიძის მიერ "რია ნოვოსტისთვის" მიცემულ ინტერვიუში იყო ისეთი პასაჟები, რომელსაც ამხელა გამოხმაურება უნდა მოჰყოლოდა?

ნ.ბ: პრემიერ-მინისტრის წარმომადგენელმა რუსეთთან ურთიერთობის საკითხებში ზურაბ აბაშიძემ რეალურად ის გაიმეორა, რაზეც მე კარგა ხანია ვსაუბრობ. ოღონდ აქამდე ხელისუფლება და თავად აბაშიძე ნაკლებად ლაპარაკობდნენ. ის ისტერიკა, რაც "ნაცმოძრაობამ" და "თავისუფალმა დემოკრატებმა" ალასანიას ხელმძღვანელობით ატეხეს, ჩემთვის აბსოლუტურად გასაგებია. ეს ორი პოლიტიკური ძალა ერთმანეთს ეჯიბრება იმაში, ვინ უფრო პროდასავლური ძალის ადგილს დაიმკვიდრებს. თუ "ნაცმოძრაობა" ადგილის შენარჩუნებას ცდილობს, "თავისუფალი დემოკრატები" "ნაცმოძრაობის" ჩანაცვლებას ცდილობენ, რომ როგორმე დაანახონ საკუთარი პოლიტიკური ძალის პროდასავლურობა დასავლელ პატრონებს. ამ ძალების აპელირება ნათლად აჩვენებს მათ მიზანს. სამწუხაროდ, არც ქვეყანა აინტერესებთ და არც რეალობა.

"რ": ამბობთ, რომ ქვეყნის საგარეო კურსი პიარის ნაწილად აქციეს?

ნ.ბ: რა თქმა უნდა, ეს პიარის ნაწილია, ისევე როგორც თანამდებობების დატოვება აქციეს პიარის ნაწილად, თუმცა ეს ძალიან ცუდად გამოუვიდათ. ძალიან სასაცილოა, რომ ალასანიას გუნდმა რეალურად ოპოზიციაში გადასვლაც კი ვერ მოასწრო, როდესაც ყველაფერი იმის კრიტიკა დაიწყეს, რომლის ნაწილიც თავად იყვნენ. შეგახსენებთ, რომ ისინი ოპოზიციაში მას შემდეგ გადავიდნენ, როდესაც მათი ლიდერი თანამდებობიდან გაათავისუფლეს. ალასანია რომ არ გაეთავისუფლებინა პრემიერს, დღესაც ხელისუფლებაში იქნებოდნენ და არც აბაშიძის განცხადებები შეუქმნიდათ უხერხულობას და არც ივანიშვილის კულისებიდან მართვა.

აბაშიძის განცხადებებს რაც შეეხება, საკმაოდ გონივრული იყო, მაგრამ პრობლემა ისაა, რომ არც მისი მანდატი და არც ამ შეხვედრების ფორმატი არ ითვალისწინებს ასეთი განცხადებების კეთების შესაძლებლობას.

"რ": მაია ფანჯიკიძემ "რეზონანსთან" ინტერვიუში თქვა, რომ აბაშიძის განცხადება გავლენას მოახდენს ნატოს წევრი ქვეყნების იმ ლიდერებზე, რომლებიც ისედაც სკეპტიკურად უყურებდნენ ჩვენს ინტეგრაციას ალიანსში. გუშინ უკვე მოვისმინეთ საფრანგეთის პრეზიდენტის, ფრანსუა ოლანდის განცხადება, რომ ნატო გაფართოებას არ აპირებს...

ნ.ბ: თქვენ და მაია ფანჯიკიძეს გგონიათ, რომ ოლანდი აბაშიძის განცხადებების მიხედვით იღებს გადაწყვეტილებებს? ოლანდამდე გაცილებით ადრე ეს თქვა მერკელმა, თავის დროზე ეს განაცხადა რასმუსენმა, შარშან ეს ობამაც თქვა...

მე ძალიან კარგად მესმის, რომ დასავლეთმა ანგარიში გაუწია რუსეთს. ნათლად დაიწყო საუბარი, რომ საქართველო ნატოში ვერ შევა. რუსეთის განცხადებები არ არის ის, რომლის იგნორირებაც დასავლეთს შეუძლია.

კიდევ ერთხელ ვიმეორებ, დასავლელმა პარტნიორებმა ინგლისურად გვითხრეს, გერმანულად, ფრანგულად, რუსულად და ქართულადაც, რომ საქართველოს არ აქვს ნატოში გაწევრიანების პერსპრექტივა. თუ ეს განცხადება მოულოდნელი იყო ჩვენი ხელისუფლებისთვის, კიდევ უარესი, ეს ნიშნავს, რომ ჩვენი ბედი და ჩვენთან დაკავშირებული საკითხები ჩვენ გარეშე წყდება ისე, რომ ამაზე არავინ საქმის კურსში არ გვაყენებს.

გუშინ ოლანდმა საბოლოო წერტილი დაუსვა საქართველოს ნატოში გაწევრიანების შანსს უახლოესი ათწლეულების განმავლობაში. ნატოს წევრ ქვეყნებს ალიანსის გაფართოების საკითხზე ვეტოს უფლება აქვთ. დაახლოებით ასეთი შთაბეჭდილება დამრჩა, რომ ვერ გაიგეს ამ ქართველებმა დიპლომატიურად ნათქვამი და ახლა პირდაპირ სახეში უნდა მოგახალოთ, რომ ვერ გახდებით ალიანსის წევრიო. დაახლოებით ასე ჟღერდა მისი განცხადება. ასეთი მკვეთრი განცხადება დიპლომატიისთვის არადამახასიათებელი ენა არაა, მაგრამ როგორც ჩანს, მათ პირდაპირ თქმა გადაწყვიტეს. თუ ახლა კიდევ გავაგრძელებთ ნატოს კარზე კაკუნს, ეს ქვეყანას არავითარ სიკეთეს არ მოუტანს.

"რ": აბაშიძესთან შეხვედრიდან გამოსულმა კარასინმა განაცხადა, რომ უახლოეს წლებში საქართველო თავად აღიარებს აფხაზეთისა და ოსეთის დამოუკიდებლობას, მაშინ როდესაც აბაშიძემ თქვა, რომ ამ საკითხზე საერთოდ არ უმსჯელიათ. რაზე მიანიშნებს ეს პოზიცია?

ნ.ბ: ეს აბსოლუტურად მიუღებელია ჩემთვის, ვინც უნდა თქვას, ეს იქნება კარასინი თუ პუტინი. არასოდეს შევეგუებით იმას, რომ ჩვენი განუყოფელი ნაწილი აფხაზეთი და სამაჩაბლო არ იყოს საქართველოს შემადგენლობაში.

პირდაპირ გეტყვით, ჩვენ რომ მოლაპარაკება დაგვეწყო თუნდაც ორი წლის წინ, ბიძინა ივანიშვილს კეთილი ენება და შეხვედროდა პუტინს ან ღარიბაშვილი და მარგველაშვილი ჩამოყალიბებულიყვნენ და მოლაპარაკება ეწარმოებინათ რუსეთთან, კარასინი ასეთ განცხადებას არ გააკეთებდა.

5 წლის წინ, როდესაც პუტინს შევხვდი, კონკრეტული შედეგების მიღწევის გაცილებით მეტი შანსი გვქონდა, ვიდრე დღეს გვაქვს. ყველა იმ ადამიანმა, ვინც მე პრორუსს მეძახდა, ნებსით თუ უნებლიეთ, ყველაფერი გააკეთა იმისთვის რომ საქართველოსა და რუსეთს შორის მოლაპარაკება არ გამართულიყო. მოვა დრო და ამას დავამტკიცებ, რადაც უნდა დამიჯდეს.

"რ": როგორ ფიქრობთ, რუსი ოპოზიციონერის, ბორის ნემცოვის მკვლელობა ვის ინტერესში შედიოდა?

ნ.ბ: რუსეთის ხელისუფლების ინტერესში რომ არ შედიოდა, ეს შემიძლია აბსოლუტურად დაბეჯითებით გითხრათ. მის თანამებრძოლებსა და თანაგუნდელებსაც არ უთქვამთ, რომ რუსეთის ხელისუფლებამ მოკლა, მაგრამ ეს თქვეს "რესპუბლიკელებმა" და "თავისუფალმა დემოკრატებმა".

როგორ ფიქრობთ, ეს რომ პუტინის ხელისუფლებას სდომოდა, მაინცდამაინც კრემლის ფონზე მოკლავდნენ და მსოფლიოს აჩვენებდნენ, როგორ არის ოპოზიციონერი ლიდერი კრემლის ფონზე მოკლული?! ეს არის იმის ინტერესში, ვისაც რუსეთში დესტაბილიზაციის მოწყობა სურს და რუსეთის იმიჯის მაქსიმალური შელახვა უნდა.