"არ მიმაჩნია სწორად, რომ პრეზიდენტის გამოსვლას გუშინ არ დაესწრნენ მთავრობის წევრები. ჩვენ საქმე მარგველაშვილთან კი არ გვაქვს, არამედ ქვეყნის მეთაურთან. ქვეყანას, სახელმწიფო ინსტიტუტებს უნდა ვცეთ პატივი და არა კონკრეტულ პიროვნებას," - აცხადებს "რეზონანსთან" საუბრისას პარლამენტის საგარეო ურთიერთობათა კომიტეტის თავმჯდომარე თედო ჯაფარიძე.

თედო ჯაფარიძე: პრეზიდენტის გამოსვლაში საინტერესო გზავნილები იყო საგარეო პოლიტიკისა და უსაფრთხოების საკითხებზე. ერწმუნეთ ჩემს გამოცდილებას, გზავნილი, რომ საქართველო ევროატლანტიკური კურსის ერთგულია, ძალიან მნიშვნელოვანია.

"რეზონანსი": თუმცა მან მმართველი გუნდი გააკრიტიკა, ამ გზაზე საკმარისად აქტიური არ არისო...

თ.ჯ: როგორც მმართველი გუნდის წევრი, ვაცხადებ, რომ აქტივობა არ დაგვიკლია. ყოველ შემთხვევაში ჩვენს დონეზე, ვგულისხმობ პარლამენტის საგარეო ურთიერთობათა კომიტეტს. უფრო მეტს გეტყვით. ცოტა ხნის წინ ვიყავი ბრიუსელში ნატო-საქართველოს კომისიის სხდომაზე. შევხვდი მაღალი რანგის თანამდებობის პირებს, სადაც მათ გვითხრეს, რომ ქართული მხარე, განსაკუთრებით კი სამხედროები, ძალიან აქტიურობენ. ნატოს თანამდებობის პირები ამბობენ, რომ ჩვენ უფრო აქტიურები ვართ, ვიდრე ალიანსი ჩვენთან მიმართებაში.

"რ": როგორ ფიქრობთ, ალიანსის მხრიდან რატომ არ არის შემხვედრი ნაბიჯები ჩვენ მიმართ და რა ხდება ნატოს არსებით პაკეტთან დაკავშირებით?

თ.ჯ: ნატოსთან ურთიერთობის ბევრი საკითხი არ არის საჯარო. ის, რომ არსებობს ნატო-საქართველოს კომისია, ყოველწლიური გეგმა, უკვე პროგრესია. ჩვენ ხარისხობრივად ჩქარი ტემპით მივიწევთ წინ.

"რ": შესაძლოა, ნატოს არსებითი პაკეტის საიდუმლო ნაწილზე საზოგადოებას არ მიუწვდებოდეს ხელი, მაგრამ როდესაც ამაზე პრეზიდენტი სთხოვს ინფორმაციას თავდაცვის უწყებას და ის ამ ინფორმაციას არ აძლევს, ეს რამდენად სწორად მიგაჩნიათ, მით უმეტეს, რომ პრეზიდენტი ქვეყნის მთავარსარდალიცაა...

თ.ჯ: მე ეს არ მიმაჩნია სწორად, ისევე როგორც ის, რომ პრეზიდენტის გამოსვლას გუშინ არ დაესწრნენ მთავრობის წევრები. ჩვენ საქმე მარგველაშვილთან კი არ გვაქვს, არამედ ქვეყნის მეთაურთან. ქვეყანას, სახელმწიფო ინსტიტუტებს უნდა ვცეთ პატივი და არა კონკრეტულ პიროვნებას. ამ ფაქტმა მე შემაშფოთა.

ეს არის საჯარო პოლიტიკა, რომელსაც უსმენენ ჩვენი მოქალაქეები. გუშინ მათ შეიტყვეს, რომ პრეზიდენტმა ორჯერ მიმართა თავდაცვის უწყებას კონკრეტული ინფორმაციის მიწოდებაზე, მაგრამ უარი მიიღო. ეს ნიშნავს, რომ პრეზიდენტსა და პრემიერს შორის რაღაც გაუგებრობას აქვს ადგილი. ჩვენი მოქალაქეებისთვის უნდა დაგვენახვებინა გუშინ, რომ ვართ ერთი გუნდი, რომელსაც აქვს ძალიან მნიშვნელოვანი ამოცანები გადასაჭრელი.

"რ": დეპუტატი გოგი თოფაძე ბოლო დროს აკეთებს ნეგატიურ განცხადებებს ნატოზე. მანამდე იყო ზურაბ აბაშიძის ინტერვიუ, რომელსაც ასევე ხმაური მოჰყვა... ხომ არ ახდენს ეს განცხადებები გავლენას ჩვენს დასავლელ პარტნიორებზე?

თ.ჯ: ეს განცხადებები არაფერზე არ ახდენს გავლენას, ვინაიდან ჩვენმა პარტნიორებმა იციან, რომ ევროატლანტიკური არჩევანი გააკეთა ჩვენმა ხალხმა. მართალია, "ქართული ოცნება" კოალიციური გუნდია, მაგრამ ეს არ არის მონოლითი. ეს არ არის იდეოლოგიაზე აწყობილი გუნდი, სადაც ლიდერი ამბობს ერთ რაღაცას და ეს უნდა გაიმეოროს ყველამ. "ნაცმოძრაობისგან" განსხვავებით ჩვენ ასეთი რაღაც არ გვახასიათებს.

"რ": მათ შორის პრინციპულ საკითხებთან დაკავშირებითაც, შესაძლოა, რომ გუნდში აზრთა სხვადასხვაობა იყოს?

თ.ჯ: დიახ, პრინციპულ საკითხებთან დაკავშირებითაც. კოალიციაში უმრავლესობა ვიზიარებთ იმ პოზიციას, რაც ხალხმა მიიღო, რომ ჩვენ უნდა ვიაროთ ევროატლანტიკური მიმართულებით. მაგრამ არიან ადამიანები, ვისაც აქვს განსხვავებული აზრი. პირადად მე განსხვავებულ აზრს პატივს ვცემ.

"რ": აბაშიძე-კარასინის შეხვედრათა ფორმატზე რას ფიქრობთ, პრეზიდენტმა თქვა, რომ კანონით არ არის დადგენილი, რა მანდატი აქვს ზურა აბაშიძეს...

თ.ჯ: ამის შესახებ დეტალების სრული ნუსხა მე არ გამაჩნია, შესაძლოა, კანონით არ არის დადგენილი. მაგრამ ეს ხომ არ არის ოფიციალური შეხვედრები. ეს არის რეგულარული საუბრები ორ ქვეყანას შორის, რომელიც იმართება პრაღაში. მე მიმაჩნია, რომ რაც შეიძლება მეტი საკომუნიკაციო არხი უნდა იყოს რუსეთსა და საქართველოს წარმომადგენლობებს შორის.რიგ საკითხებთან მიმართებაში ინოვაციურები და კრეატიულები უნდა ვიყოთ. აუცილებელია საუბარი ჩვენთვის მტკივნეულ საკითხებზეც. აფაზეთთან და სამხრეთ ოსეთთან გაფორმდა ე.წ. ხელშეკრულებები და ამ მტკივნეულ საკითხზე საუბარი ძალიან მნიშვნელოვანია. მით უმეტეს ისეთი გამოცდილი დიპლომატების მხრიდან, როგორებიც ბატონი აბაშიძე და კარასინი არიან.

ამ ყოველივეს მიუხედავად, მე ვერ გავაკეთებ ოპტიმისტურ განცხადებას, რამეთუ ჩვენი ჩრდილოელი მეზობელი ძალიან ხისტი და არცთუ ისე სასიამოვნო პარტნიორია არ მხოლოდ საქართველოსთვის, არამედ მთლიანად დასავლეთისთვის.

"რ":: ამერიკულ პრესაში გაჟღერდა, თითქოს აშშ-ის ყოფილი სახელმწიფო მდივნის, ჰილარი კლინტონის მრჩეველი ბიძინა ივანიშვილს 2012 წელს არალეგალურად ლობირებდა. რა ინფორმაციას ფლობთ ამ თემაზე?

თ.ჯ: სტატიაში ნახსენებია ჯონ კორნბლუმიც, რომელიც ჩემი ახლო მეგობარია. მერწმუნეთ, მას აშშ-ში არავითარი ლობისტური საქმიანობა არ ჰქონია. "ქართულ ოცნებას" ის ეხმარებოდა ევროპაში კონტაქტების დამყარებაში. ის გვეხმარებოდა როგორც მეგობარი, რაშიც გასამრჯელოს არ იღებდა. თუ ის ამას აშშ-ში გააკეთებდა, რეგისტრაცია უნდა გაევლო, თუმცა, როგორც გითხარით, ამერიკაში ლობისტურ საქმიანობას არ ეწეოდა.

ეს ეპიზოდი არის იმ კამპანიის ნაწილი, რომელიც მიმართულია ჰილარი კლინტონის წინააღმდეგ. მოგეხსენებათ, კლინტონი აპირებს კენჭი იყაროს ამერიკის საპრეზიდენტო არჩევნებში, ამიტომ მას აუგორეს შავი პაირი, რაც ამერიკულ პოლიტიკურ ცხოვრებაში ჩვეულებრივი მოვლენაა. ეს არის კერძო მიმოწერა კორნბლუმსა და კლინტონის მრჩეველ სინდი ბლუმენტალს შორის. ესეც კითხვებს ბადებს, ვინაიდან ჰაკერობა ეს უკვე კრიმინალია. მერწმუნეთ, ეს რამდენიმედღიანი სკანდალია.

დაახლოებით ვხვდები, ვინ გაახარა ამ სკანდალმა ჩვენს ქვეყანაში. ჩემს კოლეგებს თქვენი გაზეთის საშუალებით მინდა შევუთვალო, რომ ის თითიდან არის გამოწოვილი და ვერც ქართულ-ამერიკულ ურთიერთობას მიაყენებს ზიანს და ვერც ამერიკისა და "ქართული ოცნების" ურთიერთობებს.