"ძალიან უცნაურ ვითარებაში ვართ. პარლამენტის ორი შენობა გვაქვს, ერთის მშენობლობა 350 მილიონი ლარი დაჯდა, ახლა უკვე პრეზიდენტის რეზიდენციის ორი შენობა გვექნება, რომლის მარტო გარემენტება 26 მილიონი ლარი დაჯდა, თორემ მისი ღირებულება გაცილებით მეტია. ვფიქრობ, რომ თუ ყაირათიანად მივუდგებით ჩვენს სიტუაციას, ურიგო არ იქნება, მათ შორის უმაღლესი თანამდებობის პირებიც.

"ავლაბრის შენობა არ არის სრულად ათვისებული. პრაქტიკულად ნახევრადცარიელია. სააკაშვილი რა უფლებების მქონე პრეზიდენტიც იყო, ეს შენობა სჭირდებოდა და მიკვირს, კიდევ დიდი შენობა რომ არ აიშენა. ამ ვითარებაში კი, პრაქტიკულად, საპარლამენტო რესპუბლიკის პრეზიდენტის უფლებებში ქვეყნის მეთაურს ათონელის რეზიდენცია უფრო გამოადგება", - აცხადებს "რეზონანსთან" საუბრისას პარლამენტის ვიცე-სპიკერი, "კონსერვატორი" ზვიად ძიძიგური.

დეპუტატი კომენტარს რიგის სამიტზეც აკეთებს და ამბობს, რომ ევროკავშირის ქვეყნების მხრიდან საქართველოს მტკიცე მხარდაჭერა აქვს, თუმცა ყველაფერი მაინც მსოფლიო კონიუნქტურის ჭრილში განიხილება. ამის მიუხედავად, უმრავლესობის ერთ-ერთი ლიდერი ელოდება, რომ რიგის სამიტზე საქართველოს სავიზო ლიბერალიზაციას მიანიჭებენ.

"რეზონანსი": მთავრობაში კიდევ ერთი საკადრო ცვლილება განხორციელდა. ინფრასტრუქტურის მინისტრის თანამდებობაზე დავით შავლიაშვილი ნოდარ ჯავახიშვილმა შეცვალა. ხომ არ მივდივართ ნელ-ნელა იქითკენ, რომ ახლო მომავალში პარლამენტში მთავრობის ნდობის საკითხი დადგება?

ზვიად ძიძიგური: შავლიაშვილის გადადგომის შემდეგ რომ მთავრობის ნდობის საკითხი არ დადგება, ცხადია. მთავრობის მესამედი არის 7 მინისტრი. იმისათვის, რომ მთავრობის ნდობის საკითხი დადგეს, საჭიროა კიდევ ორი მინისტრის შეცვლა, ასე რომ, მინისტრთა კაბინეტის ნდობის საკითხზე საუბარი ჯერ ნაადრევია და არც ზღვარზე არ ვდგავართ. შესაბამისად, არავითარი პოლიტიკური ვნებათაღელვა მთავრობის ნდობის საკითხზე არ გველოდება.

"რ": რაც შეეხება შავლიაშვილის გადადგომას, ამას როგორ აფასებთ, თქვენი ინფორმაციით, ეს გადაწყვეტილება მან თავად მიიღო?

ზ.ძ: მიზეზად დასახელდა ის, რომ ბატონ დავითს აქვს ჯანმრთელობის მდგომარეობასთან დაკავშირებული პრობლემები და ამიტომ გადადგა. მე არ მაქვს არავითარი საფუძველი, რომ ამ მიზეზში ეჭვი შევიტანო.

მინდა გითხრათ, რომ შავლიაშვილი ძალიან წარმატებული მინისტრი იყო. მისმა უწყებამ პირველკვარტალური გეგმა შეასრულა 100%-ით და გადააჭარბა კიდეც გეგმის შესრულებას. ეს მაშინ, როცა ამ სამინისტროსთვის პირველი კვარტალის გეგმის შესრულება ყოველთვის პრობლემა იყო. ამინდებისა თუ ტენდერების გამო წლის პირველ თვეებში უჭირდათ ხოლმე გეგმის შესრულება. ახლა ეს ბარიერი სამინისტრომ დაძლია. ასე რომ, მინისტრის გადადგომის მიზეზი შავლიაშვილის წარუმატებლობაში არ უნდა ვეძებოთ.

"რ": პრეზიდენტსა და მთავრობას შორის აგორებულ მორიგ სკანდალზე რას ფიქრობთ, ისევ ვერ ხდება შეთანხმება. მთავრობა ითხოვს, რომ პრეზიდენტი ავლაბრიდან ათონელის რეზიდენციაში გადავიდეს, გიორგი მარგველაშვილი კი ამას არ აპირებს...

ზ.ძ: კარგი იქნებოდა, რომ გადასულიყო, თუმცა პრემიერმაც თქვა და ჩვენც ვიზიარებთ, რომ მას ვერავინ ვერაფერს აიძულებს. მაგრამ მინდა გითხრათ, რომ მარგველაშვილის ეს გადაწყვეტილება სახელმწიფო ბიუჯეტს 26 მილიონი ლარით აზარალებს.

"რ": რას გულისხმობთ?

ზ.ძ: 26 მილიონი გადაიხადა სახელმწიფომ, ხალხმა, თითოეულმა ჩვენგანმა იმისათვის, რომ ათონელის რეზიდენცია გარემონტებულიყო. შენობა გარემონტდა პრეზიდენტის ადმინისტრაციის წარმომადგენლების აქტიური მონაწილეობით და მათი მოთხოვნის შესაბამისად. იგი არის გარემონტებული ძალიან მაღალ დონეზე, უმაღლესი დონის პერსონის მოთხოვნების შესაბამისად. უმაღლესი დონის დელეგაციების მისაღები რეზიდენციაა.

საპრივატიზაციო ნუსხიდანაც მისი ამოღება სწორედ ამის გამო მოხდა, რომ ინვესტორების დაინტერესება ასეთი სპეციფიკური ნაგებობის მიმართ არის ძალზედ ნაკლები. თუ პრეზიდენტი არ გადადის ათონელზე მდებარე რეზიდენციაში, გამოდის, რომ ჩვენ 26 მილიონი ლარი ვიზარალეთ.

თუ იგი არ აპირებდა ამ შენობაში გადასვლას, მაშინ მას ამის შესახებ თავიდანვე უნდა ეთქვა და სხვაგვარად მოხდებოდა ამ შენობის გარემონტება და იგი სხვა რამეზე იქნებოდა გათვლილი.

"რ": პრეზიდენტის ადმინისტრაციაში ამბობენ, რომ მათ ამის შესახებ განცხადება 2014 წლის ივნისში გააკეთეს...

ზ.ძ: ვიმეორებ, შენობა გარემონტდა პრეზიდენტის ადმინისტრაციის მონაწილეობით და მათივე სურვილის შესაბამისად. მაშინ ეთქვათ, რომ პრეზიდენტი არ აპირებდი ამ რეზიდენციაში გადასვლას!

მე მახსოვს ბატონ მარგველაშვილის პოზიცია, რომ მას არ სურდა ავლაბრის რეზიდენციაში შესვლა. აცხადებდა, რომ იქ არის ბოროტების ბუდე და იქ შესვლა მისთვის ერთგვარ მორალურ კატეგორიებს უკავშირდებოდა.

"რ": საქმე მხოლოდ ფინანსურ მოტივებშია, თუ არის პრინციპული საკითხებიც, გაჟღერდა, რომ ბიძინა ივანიშვილს არ სურს, რომ პრეზიდენტი ავლაბრის რეზიდენციაში იყოს...

ზ.ძ: ამის შესახებ მე ვერაფერს ვერ გეტყვით. ბიძინა ივანიშვილს პოზიციის გამოხატვის პრობლემა არც პრემიერობის დროს ჰქონდა და არც ახლა.

ძალიან უცნაურ ვითარებაში ვართ. პარლამენტის ორი შენობა გვაქვს, ერთის მშენობლობა 350 მილიონი ლარი დაჯდა, ახლა უკვე პრეზიდენტის რეზიდენციის ორი შენობა გვექნება, რომლის მარტო გარემენტება 26 მილიონი დაჯდა, თორემ მისი ღირებულება გაცილებით მეტია.

ვფიქრობ, რომ თუ ყაირათიანად მივუდგებით ჩვენს სიტუაციას, ურიგო არ იქნება, მათ შორის უმაღლესი თანამდებობის პირებიც.

ავლაბრის შენობა არ არის სრულად ათვისებული. პრაქტიკულად ნახევრადცარიელია. სააკაშვილი რა უფლებების მქონე პრეზიდენტიც იყო, ეს შენობა სჭირდებოდა და მიკვირს, კიდევ დიდი შენობა რომ არ აიშენა. ამ ვითარებაში კი, პრაქტიკულად საპარლამენტო რესპუბლიკის პრეზიდენტის უფლებებში ქვეყნის მეთაურს ათონელის რეზიდენცია უფრო გამოადგება.

"რ": იუსტიციის ექსმინისტრს, ზურაბ ადეიშვილს ინტერპოლი აღარ ეძებს. გაკეთდა განცხადებები, რომ ინტერპოლი ამას საქართველოს ხელისუფლების დასტურის გარეშე ვერ გააკეთებდა. თქვენ რა ინფორმაციას ფლობთ?

ზ.ძ: მე არ ვარ ამ საქმის სპეციალისტი და ვერ გეტყვით, რა მექანიზმით ხდება ინტერპოლის სიაში ჩასმა, ან იქიდან ამოღება, მაგრამ ერთი რამ მინდა გითხრათ, რომ საერთაშორისო ძებნილთა სიიდან ამოღება ხდებოდა სააკაშვილის დროსაც. თუმცა მაშინ ეს არ პიარდებოდა ისე, როგორც ეს დღეს ხდება. თანაც ადეიშვილი საკმაოდ სკანდალური და ოდიოზური ფიგურაა იმისათვის, რათა ამ საქმეს ყურადღება მიექცეს, მაგრამ ეს არის ჩვეულებრივი მოვლენა. არსებობს საკმაოდ რთული რეგულაციები და ინტერპოლიც მის მიხედვით მოქმედებს.

"რ": თქვენმა ყოფილმა პარტნიორმა კახა კუკავამ გააკეთა განცხადება, რომ შეთანხმება მოხდა ადეიშვილსა და დღევანდელ ხელისუფლებას შორის. მან ივანიშვილის მიერ ადეიშვილის მიმართ გამოთქმული ეპითეტებიც გაიხსენა. რას უპასუხებთ?

ზ.ძ: არ შემიძლია ასეთ საკითხებზე კომენტარების კეთება. ივანიშვილი მერაბიშვილზეც ამბობდა, რომ იმ მთავრობაში ერთ-ერთი ყველაზე წარმატებული მინისტრიაო, მაგრამ მერაბიშვილი ახლა ზის საპატიმროში. მე ვფიქრობ, რომ ასეთი დასკვნების გამოტანა არასწორია. თუმცა ეს ოპოზიციისთვის დამახასიათებელია და მათ ამის სრული უფლება აქვთ. ეს არის გემოვნების საკითხი.

"რ": ხომ არ ფიქრობთ, რომ პროკურატურამ ამ საქმესთან დაკავშირებული მასალები უნდა გაასაჯაროოს, ან ხომ არ აპირებთ პროკურატურის წარმომადგენლების დაბარებას პარლამენტში, თუნდაც ნდობის ჯგუფის ფორმატში?

ზ.ძ: მე არ ვიცი, როგორ არის განსაზღვრული კანონმდებლობით საქმის მასალების გასაჯაროების საკითხი. რაც შეეხება პარლამენტში მოწვევის თემას, ამის აუცილებლობას ვერ ვხედავ. პროკურატურა ბოლო პერიოდში კარგად ამუშავდა.

კარგია, რომ სამართლიანობის აღდგენის მიმართულებით პროკურატურაში სპეციალური დეპარტამენტი შეიქმნა. პროკურატურაში იწყება რეფორმირების საკითხიც.

"რ": მოახლოებულია რიგის სამიტი. რა მხარდაჭერა აქვს ევროპისგან საქართველოს და რა შანსები გვაქვს სამიტზე, მივიღებთ სავიზო ლიბერალიზაციას?

ზ.ძ: ძალიან კარგი მხარდაჭერა გვაქვს ჩვენი პარტნიორების მხრიდან, თუმცა არ მინდა მოვლენებს წინ გავუსწრო და პროგნოზი გავაკეთო. დაველოდოთ რიგის სამიტს, იგი უმნიშვნელოვანესია და ჩვენი ქვეყნის შემდგომი განვითარება ამ სამიტზე დიდად არის დამოკიდებული.

"რ": თქვენ როდესაც ვიზიტები გქონიათ ევროპაში, მათ მტკიცე მხარდაჭერა გამოუხატავთ ვიზალიბერალიზაციასთან დაკავშირებით?

ზ.ძ: დიახ, ჩვენ მიმართ არის მტკიცე მხარდაჭერა. ოღონდ ახლა ყველაფერი განიხილება რუსეთ-უკრაინის ჭრილში და კიდევ ბევრ სხვა ჭრილში, ირანთან, ჩინეთთან და ა.შ არსებობს მსოფლიო კონიუნქტურა და ვფიქრობ, რომ ის არ შეგვიშლის ხელს, რომ სავიზო ლიბერალიზაციასთან დაკავშირებით რიგაში პოლიტიკური გადაწყვეტილება იყოს მიღებული. ამ სამიტიდან ჩვენ ძალიან სერიოზული მოლოდინი გვაქვს, თუმცა დაველოდოთ სამიტს.