რიგის სამიტისგან დადებით შედეგს ველოდებით, ამის შესახებ "რეზონანსთან" საპარლამენტო უმრავლესობის ერთ-ერთმა ლიდერმა "რესპუბლიკელმა" ლევან ბერძენიშვილმა ისაუბრა.

დეპუტატი აცხადებს, რომ ევროკავშირის ყველა ქვეყანა ამბობს, რომ საქართველომ მოთხოვნები კარგად შეასრულა და ეს მალე სპეციალურად მომზადებულ დოკუმენტშიც აისახება, თუმცა მიიღებს თუ არა ჩვენი ქვეყანა ვიზა-ლიბერალიზაციას, ეს მხოლოდ ამ ტექნიკურ დოკუმენტზე არ არის დამოკიდებული და საბოლოოდ პოლიტიკური გადაწყვეტილება უნდა იყოს მიღებული.

ბერძენიშვილის თქმით, პოლიტიკური გადაწყვეტილების მიღება ორ ქვეყანაზე - საფრანგეთსა და გერმანიაზეა დამოკიდებული. დეპუტატი ფიქრობს, რომ ვიზა-ლიბერალიზაციას მივიღებთ, მაგრამ შესაძლოა ეს ვადებში გაიწელოს.

ლევან ბერძენიშვილი მთავრობაში საკადრო ცვლილებებზეც საუბრობს და ამბობს რომ ორი "რესპუბლიკელი" პარლამენტარის - თინა ხიდაშელისა და გიგლა აგულაშვილის გამინისტრება მათი პარტიის პოზიციების გაძლიერებას არ ნიშნავს, ვინაიდან მიაჩნია, რომ საქართველო საპარლამენტო რესპუბლიკაა და საკანონმდებლო ორგანოს სიძლიერე არანაკლებ მნიშვნელოვანია, ვიდრე მთავრობის.

"რეზონანსი": რიგის სამიტის მოახლოებასთან ერთად მატულობს სხვადასხვაგვარი ინფორმაციაც. "როიტერმა" გაავრცელა ცნობა, რომ საქართველო სამიტიდან დადებით შედეგს არ უნდა ელოდოს. გერმანიის საგარეო საქმეთა მინისტრი კი ამბობს, რომ საქართველომ ყველა მოთხოვნა ზედმიწევნით კარგად შეასრულა. თქვენ ახლახან იმყოფებოდით ევროპაში. რა განწყობაა ევროკავშირის ქვეყნებში?

ლევან ბერძენიშვილი: ეს ორივე ინფორმაცია, რომელიც თქვენ დაასახელეთ, წინ უსწრებს იმ დოკუმენტს, რომელიც ჯერ არავის არ უნახავს. "როიტერი" დიდი სააგენტოა, შესაძლოა, რაღაც ნაწილი ნახა, მაგრამ ოფიციალურად დოკუმენტი ჯერ არავის არ უნახავს.

ჩვენ გვაქვს მყარი მხარდაჭერა. ბოლო პერიოდში სადაც კი ვიყავით, ყველგან გვითხრეს, რომ საქართველომ საშინაო დავალება ზედმიწევნით კარგად შეასრულა. ის, რომ თითქოს ჩვენ სადმე რამე კარგად არ გავაკეთეთ, ასეთი რამე "როიტერსაც" კი არ უთქვამს.

ცოტა უცნაური იყო განცხადება, რომ თითქოს მოლდოვას დონემდე არ ვართ მისული. ჩვენ იმაზე გაცილებით წინ ვართ წასული ვიზალიბერალიზაციის გზაზე, ვიდრე ამ ეტაპზე მოლდოვა იყო. ჩვენ მეტი მოთხოვნა წამოგვიყენეს და მეტი შევასრულეთ.

"რ": რატომ წამოგვიყენეს უფრო მეტი მოთხოვნა?

ლ.ბ: იმიტომ, რომ დრო გავიდა და მოთხოვნებიც გაეზარდა ევროკავშირს. იმათაც წაუყენეს მოთხოვნები და მოლდოვამ ეს დამატებით შეასრულა უკვე მიღებული ვიზა-ლიბერალიზაციის დროს. დამატებითი მოთხოვნები შეიძლება ჩვენთანაც დადგეს. ეს არის ჩვეულებრივი მოვლენა.

ევროპაში აშფოთებთ, რომ არ მოხდეს ევროკავშირის ქვეყნებში უკონტროლო შედინება. სწორედ მოლდოვის მაგალითმა აჩვენა, რომ ჩვენი ქვეყნებიდან ევროკავშირს არანაირი საფრთხე არ ელის. მოლდოვიდან ევროპაში ვიზიტით იმაზე გაცილებით ნაკლებმა ადამიანმა ისარგებლა, ვიდრე ეს მოსალოდნელი იყო და არანაირი პრობლემა არ შეუქმნია მოლდოვას ევროკავშირისთვის.

ჩვენ ყველგან გვითხრეს, რომ საქართველომ მოთხოვნები ძალიან კარგად შეასრულა. ახლა საჭიროა, რომ ეს ამავე სიტყვებით დაიწეროს იმ ტექნიკურ დოკუმენტში, რომელიც მალე გამოქვეყნდება.

მაგრამ მეორე საკითხია უვიზო მიმოსვლის მოცემა. ეს უკვე მეორე ნაწილია და არ არის დამოკიდებულ ტექნიკურზე, ეს არის პოლიტიკური ნაწილი. პოლიტიკური გადაწყვეტილება ამ მომენტსაც ითვალისწინებს იმიტომ, რომ თუ დავალება არ შეასრულე, ვიზა-ლიბერალიზაციას არც ერთ ვარიანტში არ მოგცემენ, მაგრამ თუ შეასრულე, შესაძლოა ახალი მოთხოვნები დაიდოს. ჩვენ აქ უძლურნი ვართ, მაგრამ იმ ქვეყანამ, ვისიც ყველაზე მეტად გვეშინია, გვითხრა, რომ ნუ გეშინიათო.

"რ": პოლიტიკური გადაწყვეტილება რაზეა დამოკიდებული?

ლ.ბ: პირდაპირ გეუბნებით, ეს დამოკიდებულია ორი ქვეყნის - გერმანიისა და საფრანგეთის პოზიციაზე. გერმანიამ თქვა, რომ არ იქნება პრობლემა, მაგრამ მას არ უთქვამს ვადები. ჩვენ ლიბერალიზაციას აუცილებლად მივიღებთ, მაგრამ ეს იქნება 2016 წლის იანვრიდან, თუ ვთქვათ, ივნისიდან, ეს არ არის ცნობილი.

თუ სამიტზე იტყვიან, რომ ვაძლევთ ვიზალიბერალიზაციას, მაშინ მოგვცემენ იანვრიდან, მაგრამ თუ თქვეს, რომ მივცემთ, მაგრამ დამატებით კიდევ რაღაცები უნდა შესრულდეს, მაშინ ვადა გადაიწევს.

ჩვენ ყველაფერი გავაკეთეთ, განსაკუთრებით ამას პარლამენტზე ვამბობ, მაგრამ რიგის სამიტი არის სამთავრობო ფორმატი და ყველაფერს მთავრობები წყვეტენ. პარლამენტები რომ წყვეტდნენ, ჩვენ დადებითი შედეგი ჯიბეში გვედებოდა. შედეგი ნებისმიერ შემთხვევაში კარგი იქნება, მაგრამ იქნება თუ არა კონკრეტულად ნათქვამი ჩვენს ევროპულ პერსპექტივაზე გაკეთებული განცხადება, არ ვიცი.

ხომ გახსოვთ მაპ-ზე უკეთესი რომ მოგვცეს ნატოს ბუქარესტის სამიტზე, ეს იქნება თუ არა ევროკავშირთან მიმართებაში, ეს ჩვენ არ ვიცით.

ნატოს შესახებ რაც იყო ნათქვამი, მაშინ ეს სერიოზულად არ აღვიქვი. მიმაჩნია, მაშინ მაპი რომ მოეცათ, უკრაინაში ომი არ იქნებოდა. კარგი იქნება, ევროპა ჩვენს მაგალითს თუ არა, უკრაინის მაგალითს მაინც თუ მიაქცევს მეტ ყურადღებას.

დარწმუნებული ვარ, რომ გადაწყვეტილება ჯერ მიღებული არ არის, ნაჩქარევია რუსეთისა და ზოგიერთი ოპოზიციონერის სიხარული, რომ საქართველო სამიტიდან ვერაფერს ვერ მიიღებს.

"რ": მიხეილ სააკაშვილი აცხადებს, რომ მოლდოვას პრემიერმა მას რეფორმატორთა ჯგუფის (ნაცმოძრაობის წევრების) გაგზავნა და დახმარების აღმოჩენა სთხოვა...

ლ.ბ: ეს განცხადება სანდოდ არ მიმაჩნია. მოლდოვაში არის უმცირესობის მთავრობა და ისინი ასეთ რისკზე ვერავითარ შემთხვევაში ვერ წავლენ. მოლდოვაში მთავრობას საპარლამენტო უმრავლესობის მხარდაჭერა არ აქვს, ასე რომ, ასეთ ექსპერიმენტებზე ვერ წავლენ.

სააკაშვილს რომ სამიტის წინ უნდა რაღაცების არევა, ეს მე არ მიკვირს. მას სურს დაამტკიცოს, რომ მის გარეშე არც საქართველოს და არც მსოფლიოს პერსპექტივა არ აქვს. სააკაშვილი უკვე სასაცილო ფიგურაა. ექსპრეზიდენტი იმასაც ამბობდა, რომ უკრაინაში მთავარი მრჩეველი გახდებოდა, მაგრამ ხომ გაირკვა, რომ ნახევარმრჩეველია.

"რ": თუმცა "ნაცმოძრაობის" წევრებს უკრაინაში საკმაოდ სერიოზული თანამდებობები უკავიათ...

ლ.ბ: ამაზე არავინ არ დაობს. თუკი კიდევ აქვთ რესურსი და რომელიმე ქვეყანას სჭირდება დახმარება, ღმერთმა ხელი მოუმართოთ.

"რ": იმ შემთხვევაში, თუ "ნაცმოძრაობა" ჩავა მოლდოვაში, ეს ხომ არ იქონიებს გავლენას ჩვენი და მოლდოვას ურთიერთობაზე?

ლ.ბ: რა თქმა უნდა, არა. უკრაინის შემთხვევაში ხომ არ ჰქონია არავითარი გავლენა. შეიძლება ვიღაცას ეწყინოს და განცხადებაც გააკეთოს, მაგრამ ეს არის თავად მოლდოვას გადასაწყვეტი. უკრაინაში მარტო ქართველები არ არიან დანიშნული მინისტრის მოადგილეებად. ამაში ძალიან ბევრი ქვეყანაა ჩართული.

"რ": საკადრო ცვლილებებზეც ვისაუბროთ. თქვენი თანაფრაქციელი თინა ხიდაშელი თავდაცვის მინისტრი გახდა. ასეთი შეფასებებიც გამოითქვა, რომ საგარეო ორიენტირი არ ჩანდა კარგად და ამიტომ გახდა ხიდაშელი მინისტრი...

ლ.ბ: "რესპუბლიკური" პარტია რომ პროდასავლურია, ეს ნათელია, მაგრამ ჩვენ იმიტომ ვართ ამ კოალიციაში, რომ კოალიციაც პროდასავლურია. ჩვენ ერთი საერთო დოკუმენტი გვაქვს, სადაც წერია, რომ კოალიციის მიზანი არის ევროკავშირი და ნატო.

"რ": თუმცა სხვა განცხადებებიც გვახოვს ხელისუფლებიდან...

ლ.ბ: დიახ. კოალიციის შიგნით არის ერთი კაცი - გოგი თოფაძე, რომელსაც ყოველთვის განსხვავებული მოსაზრება ჰქონდა, მაგრამ ამ პროდასავლურ დოკუმენტზე ხელი მასაც აქვს მოწერილი. ვერავითარ საფრთხეს ვერ ვხედავ იმაში, რომ ერთ კაცს აქვს თავისი მოსაზრება.

"რ": "რესპუბლიკელების" პოზიციების გაძლიერება თქვენმა პარტნიორებმა როგორ აღიქვეს?

ლ.ბ: ეს მომავალში კარგად გამოჩნდება, თუმცა მინდა გითხრათ, რომ "რესპუბლიკელების" პოზიციები არ გაძლიერებულა. ჩვენ ყოველთვის იმ ძალის ვიყავით, რა ძალისაც ახლა ვართ. თინა ხიდაშელი იყო პარლამენტშიც და საკმოდ აქტიური და გავლენიანი ფიგურა გახლდათ.

"რ": თუმცა მთავრობაში აქამდე ერთი მინისტრი გყავდათ, ახლა კი სამი...

ლ.ბ: კი ბატონო, მაგრამ ეს ნიშნავს, რომ თქვენ მთავრობა უფრო მნიშვნელოვნად მიგაჩნიათ, ვიდრე პარლამენტი, მაგრამ მე საპარლამენტო რესპუბლიკაში ვცხოვრობ და ასე სულ არ მგონია. კონკრეტულად თქვენ არ გგულისხმობთ, ვინც ასე ფიქრობს, მათზე ვსაუბრობ.

საქართველოში ხომ ასე ჰგონიათ, რომ მთავარია მინისტრი გყავდეს, თორემ პარლამენტში ვინ რას აკეთებს, ეს მნიშვნელოვნად არ მიაჩნიათ. შესაკრებთა ადგილების გადანაცვლება "რესპუბლიკელების" პოზიციების გაძლიერებას არ ნიშნავს.

მთლიანობაში იმაზე უნდა ვიფიქროთ, როგორი მინისტრები იქნებიან თინა ხიდაშელი და გიგლა აგულაშვილი. იმედი მაქვს, რომ კარგი მინისტრები იქნებიან და მიმაჩნია, რომ ეს საერთო საქმის სასარგებლოდ გაკეთდა და არა "რესპუბლიკური პარტიის" გასაძლიერებლად. ფაქტია, რომ "რესპუბლიკელები" ამ გადაწყვეტილებას ვერ მივიღებდით.