დასავლეთ გერმანიის ყოფილ დედაქალაქ ბონში იუნესკოს მსოფლიო მემკვიდრეობის კომიტეტის 39-ე სესია გაიმართა, სადაც ქართულმა მხარემ, კერძოდ კი კულტურისა და ძეგლთა დაცვის მინისტრმა მიხეილ გიორგაძემ სახელმწიფოს მხრიდან ბოლო პერიოდში მიღწეულ პროგრესზე ისაუბრა და კომიტეტს ანგარიში წარუდგინა. წლევანდელ სესიაზე საუბარი იყო საფრთხის ქვეშ მყოფ მცხეთის ისტორიულ ძეგლებზე, რომელთა მსოფლიო მემკვიდრეობის ნუსხაში დარჩენაზე კომიტეტი მომდევნო წელს იმსჯელებს, ხოლო რაც შეეხება გელათისა და ბაგრატის ტაძრებს, ამასთან დაკავშირებით ზუსტი ინფორმაცია ცნობილი მომდევნო დღეებში გახდება.