"მე კი ვარ გარემოს დამცველი არასამთავრობო ორგანიზაციის წარმომადგენელი, მაგრამ რომ გავიგე, ვინ იდგა მაგ ბიზნესის უკან, თავი დავანებე, გენაცვალე. ვის აქვს სასიკვდილოდ გასაწირი თავი? სხვა თემაზე, კი, ბატონო, მაგრამ მაგ ხეებზე ვერაფერს ვეტყვით. რად გინდათ ჩემი კომენტარი? რა დროსაც არ უნდა გაიაროთ ტყიბულიდან რაჭისაკენ, ამბროლაურისაკენ მიმავალ გზაზე, ყოველდღე ნახავთ სრულიად ჯანსაღ მორებს. ეს მორები მერე ზესტაფონსა და ქუთაისში მიაქვთ, სახერხში, ხერხავენ და გააქვთ ფოთიდან საზღვარგარეთ", - ეს ადგილობრივი არასამთავრობო ორგანიზაციის წარმომადგენელია, რომელმაც ძალიან გვთხოვა ანონიმურად დარჩენა.