ე.წ. სამხრეთ ოსეთის აღმნიშვნელი კიდევ ორი ბანერი გამოჩნდა - ამჯერად ოკუპანტებმა ბანერები ქარელის რაიონის ტერიტორიაზე, სოფელ თამარაშენის განაპირას დაამონტაჟეს. ადგილობრივი მოსახლეობის ცნობით, ძველი ბანერებიდან ახალ ნიშნულამდე მანძილი დაახლოებით 800 მეტრია.

ახალი ბანერის მიხედვით, თამარაშენლების კუთვნილი რამდენიმე ჰექტარი სახნავ-სათესი ფართობი ოსური მხარის კონტროლირებად ტერიტორიაზე მოექცა.

შეიარაღებულმა ფორმიანებმა, დე-ფაქტო რესპუბლიკის ე.წ. საზღვრის აღმნიშვნელი საინფორმაციო ბანერები იმ ტერიტორიაზე დაამონტაჟეს, სადაც ადგილობრივ მოსახლეობას ხორბლის და ქერის ნათესები აქვს.

"ევროპელი დემოკრატების" ლიდერი პაატა დავითაია ხელისუფლებას ურჩევს, რომ გაარკვიოს სად გადის წითელი ხაზები. მმართველ გუნდს მოუწოდებს ჩამოყალიბდეს, თუ რისი დათმობისთვის არის მზად. დავითაია ბლოგპოსტების აღდგენას ითხოვს.

საგარეო საქმეთა ყოფილი მინისტრი მაია ფანჯიკიძე კი მმართველ გუნდს მოუწოდებს, რომ საერთაშორისო ორგანიზაციებთან მუშაობა გაააქტიუროს. იგი იმასაც უსვამს ხაზს, რომ აბაშიძე-კარასინის შეხვედრაზე როგორ მწვავედაც უნდა დადგეს საკითხი, ეს მაინც არაფერზე ახდენს გავლენას.

მმართველ გუნდშიც მიიჩნევენ, რომ ხელისუფლების ერთადერთი ბერკეტი ქართული დიპლომატიის აქტიურობაა. საგარეო კომიტეტის თავმჯდომარე თედო ჯაფარიძე სპეცსამსახურების კარგ მუშაობასაც უსვამს ხაზს და ამბობს, რომ ამის შედეგია ის, რომ ოკუპანტების ქმედებები ზღვარს არ გასცდენია.

"ევროპელი დემოკრატების" ლიდერი პაატა დავითაია "რეზონანსთან" საუბრისას ამბობს, რომ უნდა გაირკვეს, სად გადის ჩვენი წითელი ხაზები და ტერიტორიის რა ნაწილის დათმობაზეა ხელისუფლება თანახმა."რუსეთის ფედერაციას უნდა საქართველოს სრული ოკუპაცია, უნდა, რომ ყველაფერი მისი კონტროლის ქვეშ იყოს, ამისთვის ყველაფერზე მიდის. როგორც უნდა იქცეოდეს საქართველოს მთავრობა, იქნება ეს აგრესიული პოლიტიკა თუ სირაქლემას პოზიციაში ყოფნა, მაინც არ დააკმაყოფილებთ მიღწეული შედეგი. მათ უნდათ მეტი ტერიტორიების დათმობა. ამიტომ ჩვენ უნდა ჩამოვყალიბდეთ, რა გვინდა და სადამდე ვართ დამთმობი.

"ყველას გვესმის, რომ ესენი არ არიან ოსი სეპარატისტები, ესენი რუსეთის ფედერაციის წარმომადგენლები არიან. მათი ამოცანა იყო, რომ ნავთობსადენი თავისი კონტროლის ქვეშ მოექციათ. ახლა მეორე ამოცანა აქვთ - საავტომობილო მაგისტრალის კონტროლი. ნაწილობრივ ამასაც აკონტროლებენ, იმიტომ, რომ ავტომატის დაფარვის ზონის ქვეშ არის.

"იქ რომ გასროლა მოახდინონ, მაშინ მაგისტრალზე მოძრაობა სრულად შეჩერდება, მაგრამ ესეც არ აკმაყოფილებთ და უნდათ გზის მთლიანი კონტროლი. ტრასაზე რომ ატეხონ ავტომატების სროლა, ამაზე პასუხისმგებელი ვინაა?!", - კითხულობს დავითაია, რომელიც აცხადებს, რომ 2008 წლიდან 2012 წლამდე საზღვრისპირა რეგიონებში იყო ქართული ბლოკპოსტები, სადაც ჩვენი მესაზღვრეები პატრულირებდნენ.

"ამ პერიოდში 70-მდე პოლიციელი დაიღუპა, იმაზე მეტი, ვიდრე ეს აგვისტოს ომის დროს მოხდა. ქართველი პოლიციელები სისხლის ფასად იცავდნენ ჩვენს ტერიტორიას, მაგრამ მაშინ არ ხდებოდა ე.წ. ბორდერიზაცია. დღეს ეს ბლოკპოსტები მოხსნილია. ახლა, როდესაც ეს მოხდა, რუსმა ჯარისკაცებმა დაიწყეს თავისუფალი გადაადგილება. ამ პოლიტიკით შესაძლოა, თბილისამდეც ჩამოვიდნენ. რეალურად უნდა გადაწყვიტოს ხელისუფლებამ, რა უნდა და სადამდეა ტერიტორიების დამთმობი.

"მხოლოდ და მხოლოდ დამგმობი განცხადებების კეთება საკმარისი არ არის და საჭიროა სწრაფი ღონისძიებების გატარება, რათა კიდევ მეტი ტერიტორია არ მოექცეს საფრთხის ქვეშ. მთავრობის წევრი, მაგალითად, პაატა ზაქარეიშვილი ამბობს რომ ომს ხომ არ დავიწყებთო? სწორია, მაგრამ მაშინ დავთმოთ თბილისი და დავთმოთ ჩვენი სახელმწიფოებრიობა. ამიტომ ვამბობ, რომ ხელისუფლება უნდა გაერკვეს, რისი დათმობისთვის არის მზად და სად გადის ქართული სახელმწიფოებრიობის ზღვარი.

"2008 წელს იყო ომი და დავკარგეთ ტერიტორიების 20%, მაგრამ ახლა ამ პოლიტიკით არანაკლები ტერიტორიები იკარგება. თუ წინა ხელისუფლებას დავაბრალებთ აგრესიულ პოლიტიკას, რის შედეგადაც დაიკარგა ტერიტორიები, დღევანდელი სირაქლემას პოლიტიკით უფრო მეტი ტერიტორია იკარგება. ოპოზიციაში ვარ და ხელისუფლების კრიტიკა ჩემთვის ძალიან ადვილია, მაგრამ მერწმუნეთ, რომ არ მინდა, ეს ასე იყოს", - გვითხრა პაატა დავითაიამ.

საგარეო საქმეთა ყოფილი მინისტრი მაია ფანჯიკიძე "რეზონანსთან" საუბრისას აცხადებს, რომ რუსეთისთვის ზღვარი არ არსებობს.

"რაც მეტის საშუალებას მისცემს მას საქართველოს ხელისუფლება, მით უფრო მეტს გააკეთებს. ეს ფაქტიც ადასტურებს იმას, რომ არასწორი იყო ხელისუფლების რეაქცია წინა შემთხვევაზე. მაშინ მმართველმა გუნდმა სათანადო ყურადღება არ მიანიჭა ე.წ. საზღვრის გადმოწევას და არ მოახდინა საერთაშორისო ორგანიზაციების სათანადო კონსოლიდაცია. სწორედ ამიტომ იგივე ქმედება განმეორდა.

"მაშინ ეს მოხდა აბაშიძე-კარასინის შეხვედრის წინ, ახლა უკვე ეს მათი შეხვედრის შემდეგ ხდება. ანუ არავითარი მნიშვნელობა არ აქვს იმას, რამდენად მწვავედ დააყენებს შეხვედრაზე საკითხს აბაშიძე.

"რუსეთზე არაფერი არ ახდენს გავლენას, თუკი ეს არ იქნება მძაფრი საერთაშორისო რეაქცია. ამისთვის საჭირო იყო ის, რომ საელჩოებს ჰქონოდათ მკაფიო ინსტრუქცია, თუ როგორ მოეპოვებინათ საერთაშორისო მხარდაჭერა. ამას გარდა, ოფიციალური თანამდებობის პირებსაც უნდა ემუშავათ ამ თემაზე 24 საათის განმავლობაში. ეს რომ მომხდარიყო, სამი კვირის თავზე რუსეთი იგივეს ვეღარ გაბედავდა", - გვითხრა "თავისუფალი დემოკრატების" ერთ-ერთმა ლიდერმა. ფანჯიკიძე სპეცსამსახურების როლზეც საუბრობს.

"პირველ რიგში ჩვენ უნდა გვაღელვებდეს მოსახლეობის ბედი, მათი უსაფრთხოება უნდა იყოს დაცული. ყველა შემდგომი ქმედება ამ პრიორიტეტიდან უნდა გამომდინარეობდეს.

"საკონტროლო პუნქტებს და ჩვენი სამართალდამცავების მეტ აქტიურობას რაც შეეხება, ეს, რა თქმა უნდა, გასაკეთებელია, მაგრამ ამაზე მნიშვნელოვანი არის ევროკავშირის სადამკვირვებლო მისიასთან ძალიან ინტენსიური და აქტიური თანმაშრომლობა, რათა მოხდეს მათი მაქსიმალური მობილიზაცია. როგორც ჩანს, მათი პატრულირება უნდა იყოს გაცილებით ხშირი, რადგანაც ეს არის ერთ-ერთი საერთაშორისო ინსტრუმენტი", - გვითხრა მაია ფანჯიკიძემ.

მმართველი გუნდის წარმომადგენელი, პარლამენტის საგარეო ურთიერთობათა კომიტეტის თავმჯდომარე თედო ჯაფარიძე აცხადებს, რომ ყველა ასეთ ფაქტზე ჩვენი რეაგირება უნდა იყოს მყისიერი და ძალიან ხისტი.

"რა თქმა უნდა, მომხდარ ფაქტებს ჩვენ ნეგატიურად ვაფასებთ. გასაგებია თქვენი კითხვის პათოსი, რომ სადამდე უნდა ითმინონ საქართველოს მოქალაქეებმა, მაგრამ ამ ურთულეს მომენტში ყველაზე გონივრული სწორედ მოთმინებაა. რაც უფრო აქტიური, ინტენსიური, ხისტი იქნება საერთაშორისო თანამეგობრობის ჩართულობა ამ პროცესში, მით მეტია შედეგის მოტანის შესაძლებლობა.

"ერთადერთი ბერკეტი დღეს არის ჩვენი დიპლომატიის აქტიურობა, საერთაშორისო ორგანიზაციების ჩართულობა და მათ მიერ გამოხატული მკაცრი პოზიცია. სამწუხაროდ, ეს არის ერთადერთი შესაძლებლობა, მეტი ბერკეტი ჩვენ არ გვაქვს", - გვითხრა თედო ჯაფარიძემ, რომელიც სპეცსამსახურების როლზეც აკეთებს აქცენტს.

"თქვენ მეკითხებით ძალიან სპეციფიკური ინსტიტუტების საქმიანობაზე. მე არ ვარ სპეცსამსახურების წარმომადგენელი, მაგრამ მგონია, რომ მათი დამსახურებაა, რომ რუსეთის ოკუპაციური პოლიტიკა ზღვარს არ გადავიდა. მართალია, დინამიკა ნეგატიურია, მაგრამ ზღვარს გადასული არ არის. ასე მგონია, არც გადავა", - უთხრა "რეზონანსს" თედო ჯაფარიძემ.