ექსპრემიერის ყოფილი მრჩეველი, პოლიტოლოგი გია ხუხაშვილი "კაბელების საქმეზე" რამდენიმე თვის წინათ გათავისუფლებული პირების უწყებაში აღდგენას დადებითად აფასებს. ამბობს, რომ თავის დროზე მმართველმა გუნდმა პოლიტიკური შეცდომა დაუშვა, ახლა კი სამინისტროში მათი აღდგენა შეცდომის გამოსწორებისკენ გადადგმული ნაბიჯია.

გია ხუხაშვილს "რუსთავი 2"-ის შესახებაც ვესაუბრეთ. მიიჩნევს, რომ ხალვაში მოდავე არ უნდა იყოს, ვინაიდან მიხეილ სააკაშვილის პირველი მსახური, პოლიტოლოგის აზრით, სწორედ ხალვაში იყო. ფიქრობს, რომ ხელისუფლება არ ერევა პროცესში. თუ ერევა, მაშინ ეს ხელისუფლებას უფრო დააზარალებს, რადგან ამ ადამიანური რესურსით ახალ უფრო ძლიერ და რეიტინგულ ტელევიზიას შექმნიან და თან ჩაგრულის როლშიც მოგვევლინებიან.

გია ხუხაშვილი: კაბელების საქმეზე თავდაცვის სამინისტროდან გათავისუფლებული პირების სამინისტროში დაბრუნებას სწორ გადაწყვეტილებად ვაფასებ. ვფიქრობ, რომ შედგა კანონის აღსრულება. ისინი არც ყოფილან გათავისუფლებულები, ჩამოშორებულები იყვნენ საქმიანობას. ეს განმარტება იყო თავდაცვის უწყების მხრიდან, რაც სავსებით დამაკმაყოფილებულია.

რა თქმა უნდა ამას, აქვს პოლიტიკური კონტექსტიც, რამაც შესაძლოა გარკვეული გაუგებრობა გამოიწვიოს, მაგრამ გამომდინარე იქიდან, რომ ისინი ციხეში არ ზიან და ფორმალურად სამინისტროდან გათავისუფლებულები არ ყოფილან, მათ სამსახურში არაღდგენას გარკვეული საფუძველი სჭირდებოდა.

საერთოდ, კარგი იქნებოდა, ეს ადამიანები თავიდანვე არ დაეპატიმრებინათ. პატიმრობის გამოყენება, მითუმეტეს დაუმთავრებელ გამოძიებაზე, კარგი ნამდვილად არ არის. მაშინ ხელისუფლებამ პოლიტიკური შეცდომა დაუშვა. ეს ორი ქმედება წინააღმდეგობრივია და გარკვეულ კითხვებს ბადებს, მაგრამ სჯობს, გვიან მაინც გაკეთებულიყო.

"რეზონანსი": "თავისუფალმა დემოკრატებმა" ეს გადაწყვეტილება მოიწონეს, მაგრამ ამავე დროს ხელისუფლებას მოუწოდეს, რომ ეყოს გამბედაობა და ბოდიში მოიხადოს...

გ.ხ: ეს უკვე გადაჭარბებაა. ჯერჯერობით ამ საქმეზე სასამართლოში არსებითი განხილვა არ ყოფილა. ბოდიშის მოხდაზე საუბარი ჯერ ნაადრევია. დაუსრულებელ საქმეზე ბოდიშის მოხდა გადამლაშებაა.

"რ": იუსტიციის მინისტრმა თეა წულუკიანმა თქვა, მას აქვს პრაქტიკა, რომ სამსახურიდან გათავისუფლებულ თანამშრომლებს სამინისტროში სასამართლოს დასრულების შემდეგ აღადგენს-ხოლმე...

გ.ხ: წულუკიანს ასეთი პრაქტიკა აქვს, ხიდაშელს სხვანაირი. ჩემი აზრით, ხიდაშელი უფრო კანონის დამცველია. არ მგონია, სწორი იყოს თანამშრომლის გათავისუფლება ეჭვის საფუძველზე. თუ ასეთი პრაქტიკა აქვს წულუკიანს, მაინცდამაინც კარგი პრაქტიკა არ ჰქონია.

"რ": წულუკიანის მხრიდან ეს ხიდაშელის შეფარული კრიტიკა ხომ არ იყო?

გ.ხ: წულუკიანის ეს განცხადება ასე უნდა გავიგოთ. საერთოდ ხელისუფლებაში ქალებს ერთმანეთი არ უყვართ. ეს პრობლემა არსებობს, არა მარტო საქართველოში. შესაძლოა, კონკურენციის გამო. არ არის გამორიცხული, წულუკიანი გენდერულ კონკურენტსაც ხედავდეს.

"რ": "რუსთავი 2"-ის ირგვლივ განვითარებულ მოვლენებზე რას ფიქრობთ, უკვე მიეცა პროცესს პოლიტიკური შეფასება...

გ.ხ: ეს არის ქონებრივი დავა. თუმცა ეს ეხება მედიას, ამიტომ პროცესი მაქსიმალურ გამჭვირვალობას მოითხოვს. მთავარია სამართლის ჩარჩოში ჩაჯდეს. საერთოდ ამ ქვეყანაში ყველაფერი უკუღმა ხდება. მე ხალვაშს "რუსთავი 2"-ის მოდავე მხარედ არ განვიხილავდი, მაგრამ, სამწუხაროდ, სამართლიანობის აღდგენის უცნაური გაგება გვაქვს.

თუ ვსაუბრობთ ქონებრივ დავაზე, მაშინ უნდა გვესაუბრა რეალურ მფლობელებზე - დვალზე და აქიმიძეზე. ამნეზია კი არ გვჭირს. კარგად ვიცით, რომ ეს ტელევიზია ხალვაშის არასდროს არ ყოფილა. ტელევიზია მიისაკუთრეს მიხეილ სააკაშვილმა და ირაკლი ოქრუაშვილმა და გააფორმეს ქიბარ ხალვაშზე. დვალი-აქიმიძე-კიწმარიშვილის შემდეგ კომპანიის რეალური მფლობელი არ შეცვლილა. უბრალოდ, სხვადასხვა ადამიანებზე აფორმებდნენ, ჯერ იყო ხალვაში, შემდეგ ბეჟუაშვილი, ოფშორული კომპანიები და ა.შ. ყოველთვის მფლობელი იყო მიხეილ სააკაშვილი, პირველი პიონერი მის ამ გრძელ მსახურთა რიგში იყო ქიბარ ხალვაში.

"რ": მას არ აქვს ტელევიზიის ქონებაზე დავის უფლება?

გ.ხ: ის იყო საკმაოდ წარმატებული ბიზნესმენი, ამ მიმართულებით ნამდვილად დაზარალებულია და მივესალმები, თუ დაუბრუნდება თავისი ბიზნესი, მაგრამ "რუსთავი 2"-ის ნაწილს არ ეხება. სწორი იქნება, მისი მხრიდან თუ მოინანიებს შეცდომას და აღიარებს, რომ მან მიიღო მონაწილეობა პირველი მფლობელებისთვის ქონების ჩამორთმევაში. უნდა მოყვეს ყველა დეტალი.

სამართლიანობის აღდგენის პროცესს რომ ვაკვირდები, ისინი უფრო აღწევენ შედეგს, ვინც თავის დროზე თვითონ ართმევდნენ სხვებს. შემდეგ კი მათაც წაართვეს და ახლა დაზარალებულებად გვევლინებიან.

"რ": ხომ არ ხედავთ იმას, რომ ამ ქონებრივ დავაში ჩართული ხელისუფლებაცაა?

გ.ხ: არ მგონია, რომ ხელისუფლებიდან ამაში ვინმე ერეოდეს. ვერ წარმომიდგენია, რომ მმართველ გუნდში ასეთი სულელები სხედან. პროცესი აზარალებს ხელისუფლებას იმიტომ, რომ მის მიმართ დასმული კითხვები არჩევნების წინ მას ძალიან სერიოზულ პრობლემას უქმნის.

ხალვაშმა დავა რომც მოიგოს, ამით რა იცვლება?! ტელეკომპანია კიდევ უფრო ძლიერდება. ციფრულ მაუწყებლობაზე გადასვლის შემდეგ შენობა და ტექნიკა აღარაფერს ნიშნავს. მთავარი ფასეულობა ადამიანური რესურსი და საინფორმაციო ტექნოლოგიებია.

თუ ჩამოართმევენ ტელევიზიას, ჩამოართმევენ შენობას და ტექნიკას. რა გგონიათ, ფულს ვერ იშოვიან?! გააკეთებენ ალტერნატიულ ტელევიზიას ბევრად უფრო მაღალი რეიტინგით, იმიტომ რომ დაჩაგრულის იმიჯს შექმნიან. ეს მათთვის ბევრად უკეთესი სტარტი შეიძლება გამოდგეს.