წელიწადზე მეტი გავიდა და თბილისის მერის ერთ-ერთი მთავარი საარჩევნო დაპირება - "სითი პარკის" პრობლემა ისევ გადაუჭრელია. საარჩევნო კამპანიისას მერობის კანდიდატი ამბობდა, რომ თბილისელებს "სითი პარკს" მოაშორებდა, მერად გახდომისთანავე მოსახლეობამ მორიგი დაპირება მიიღო, რომ ახალ წლამდე ყველაფერი გაირკვეოდა, შემდეგ - პრობლემა გაზაფხულზე მოგვარდებოდა. ახლა შემოდგომა მოდის და თბილისის მერიიდან ისევ ეს ფრაზები გვესმის. ამასობაში, "სითი პარკი" მშვიდად აგრძელებს წინა ხელისუფლების დროს დაწყებულ საქმიანობას, "იპარავს" ავტომობილებს და შემოსავლების დიდ ნაწილს ისევ საკუთარ ბიუჯეტში აგროვებს.