ხელისუფლების მიმართ ოპოზიციის შეფასება - "უნიათო ხელისუფლება" უკვე თვით კოალიციის წევრებმაც აიტაცეს. უმრავლესობის დეპუტატი ზვიად კვაჭანტირაძე პეკინის ქუჩაზე საბავშვო ბაღის ნგრევისა და ხეების გაჩეხვის სანაცვლოდ მაღლასართულიანი კორპუსის მშენებლობას აპროტესტებს და თბილისის მერიის წარმომადგენლებს მოსახლეობის იგნორირებაში ადანაშაულებს. მისი თქმით, ის, რაც პეკინის ქუჩაზე ხდება, მერიის უნიათობის და გულგრილობის ბრალია.

"ადამიანებთან ასე მოქცევა უსამართლობაა და არ შეიძლება. შემდეგ გამოდიან და ხელისუფლებას ლანძღავენ. მე ვიცი, რომ ეს არის უბრალოდ უნიათობისა და გულგრილობის ბრალი, რადგანაც არავინ მისულა და ხალხი მათ ასე "კიდიათ", ამიტომაც დავწერე მეც - "დაგიკიდებთ" და საჯაროდ გაგაკრიტიკებთ-მეთქი," - აცხადებს "რეზონანსთან" საუბრისას კვაჭანტირაძე.

მანამდე კი ოზურგეთის მაჟორიტარმა დეპუტატმა "ფეისბუკში" ასეთი სტატუსი დაწერა:

"აქამდე რომ არ მეცადა, დღეს საჯაროდ არ დავპოსტავდი, მაგრამ რადგანაც ასეა... რადგანაც უკაცრავად და "გკიდიათ," მეც ხმამაღლა შევუერთდები ხალხის პროტესტს, ვინაიდან ვთვლი, რომ 1. პეკინის ქუჩის მოსახლეობა მართალია 2. თბილისის მერიის შესაბამისი ჩინოვნიკების ასეთი გულგრილი დამოკიდებულება მოსახლეობის ინტერესების მიმართ კატეგორიულად მიუღებელია და უსამართლოდ და ხელოვნურად განაწყობს ხალხს ზოგადად ხელისუფლების წინააღმდეგ.

"ამას არ დავუშვებთ! ჩვენ ვართ ხალხის ხელისუფლება და ხალხის ინტერესი ჩვენთვის არის ნომერ პირველი საზრუნავი. ვისაც ეს არ ესმის, იმათ არაფერი ესაქმებათ ჩვენ გვერდით", - წერს "ფეისიბუკში" კვაჭანტირაძე.

ზვიად კვაჭანტირაძე: მერიის წარმომადგენლებს არაერთხელ ვთხოვე, ხალხთან მისულიყვნენ და დალაპარაკებოდნენ და ამას არანაირი რეაგირება არ მოჰყოლია, ხალხთან საკითხის გასარკვევად არავინ მისულა. უბრალოდ, კონკრეტულად ვისთანაც მქონდა საუბარი, არ მინდა იმ ადამიანების გვარების დასახელება, რადგან სოციალურ ქსელში დაწერილ ჩემს სტატუსს უკვე მოჰყვა გამოხმაურება, დამირეკეს, შეწუხდნენ და ვფიქრობ, შესაძლოა, გამოსავალი გამოიძებნოს.

"რეზონანსი": ანუ, აღარ აშენდება მაღალსართულიანი კორპუსი?

ზ.კ.: ამას არ ვამბობ, არ ვამბობდი, რომ აშენდეს ან არ აშენდეს. მეზობლებსაც ასეთივე დამოკიდებულება აქვთ - უბრალოდ ადამიანად ჩაგვთვალონ, მოვიდეს ვიღაც და დაგველაპარაკოსო. საჩივარი დაწერეს და პასუხი არავინ გასცა. საქმე სასამართლოშიც აქვთ შეტანილი, მაგრამ ჯერ განხილვაც არ დაწყებულა.

ამით ოპოზიციონრები სარგებლობენ. ოღონდ სადმე უკმაყოფილო ხალხი ნახონ, 10 კაციც რომ იყოს, მივარდებიან და სისინებენ ირგვლივ - აი, ჩვენ გვერდით გიდგავართო. არადა, თავად აქამდე რას აკეთებდნენ, არ იცოდეს მაინც ხალხმა...

მე იქვე ვცხოვრობ და ხალხი მეუბნება, ხელისუფლებიდან მოვიდეს რა ვინმე, ხალხად ჩაგვთვალონო. არადა, ისეთი სიტუაციაა, მიხედვა სჭირდება. ბაღის დანგრევის შემდეგ მაღალსართულიანი კორპუსისთვის მიწის სამუშაოები და ბურღვა დაიწყეს, ირგვლივ კი სულ ავარიული, გაბზარული სახლებია და მოსახლეობას საკუთარი სახლების ნგრევის შიში აქვს. ამის გამო წავიდა პროტესტის დიდი ტალღა. ხალხი ღამეებს ათენებს.

რატომ ქმნიან პრობლემას იქ, სადაც შეიძლება არ შეიქმნას?! ამას ვერანაირად ვერ ვხვდები. ეს საკითხი შესასწავლია. საკითხის ტექნიკურად გადაწყვეტა აუცილებელია, ვიღაცებმა კომპეტენტური დასკვნა უნდა დადონ.

ადამიანებთან ასე მოქცევა უსამართლობაა და არ შეიძლება. შემდეგ გამოდიან და ხელისუფლებას ლანძღავენ. მე ვიცი, რომ ეს არის უბრალოდ უნიათობისა და გულგრილობის ბრალი. რადგანაც არავინ მისულა და ხალხი მათ ასე "კიდიათ", ამიტომაც დავწერე, მეც - "დაგიკიდებთ" და საჯაროდ გაგაკრიტიკებთ-მეთქი.

"რ": თქვენი დამოკიდებულება როგორია - მერი, რომელიც მილიონი ხის დარგვას დაგვპირდა, ხეებს უნდა ჭრიდეს ქალაქის ცენტრში და ამის ხარჯზე მაღალსართულიან კორპუსებს აშენებდეს?

ზ.კ.: ჩემი აზრით, არა. ხეების მოჭრა კატეგორიულად მიუღებელია, მილიონ ხეს დავპირდით ხალხს.

"რ":თქვენ ამბობთ, რომ ეს ყველაფერი უნიათობის ბრალია. ამ ხელისუფლებას უნიათობაში სწორედ "ნაციონალები"ადანაშაულებენ და გამოდის, თქვენ ეთანხმებით ოპონენტებს საკუთარი გუნდის შეფასებაში?

ზ.კ.: ეს არის ქართული სიტყვა და მეც ზუსტად მანდ ვარ, რომ რაც ხდება, ეს ჩინოვნიკების ბრალია და კრიტიკას აბსოლუტურად უსამართლოდ იმსახურებს ხელისუფლება. ძალიან ბევრი სიკეთე და კარგი საქმე კეთდება და ვიღაც ჩინოვნიკების გამო კი ხალხი ხელისუფლებას აკრიტიკებს.

ამ კრიტიკით მინდოდა, მერიის ხელმძღვანელობა გამომეფხიზლებინა, რომ ხალხის სამართლიან მოთხოვნას ყურადღება მიაქციონ და ყველა ის პრეტენზია გაითვალისწინონ, რომელიც მოსახლეობას გააჩნია.

"რ": თქვენი ეს საჯარო კრიტიკა იმას ხომ არ ნიშნავს, რომ გუნდში ერთმანეთის კრიტიკას მოუხშირეთ?

ზ.კ.: კონკრეტულად არავისკენ ხელს არ ვიშვერ, მე ჩემი გუნდის წევრებს, მერიის ხელმძღვანელობას მოვუწოდებ, რომ ამ საკითხით დაინტერესდნენ და მოსახლეობის პრეტენზიებს ასე ნუ გაატარებენ.

დარწმუნებული ვარ, ამ საკითხის მოგვარება ისე, რომ მოსახლეობა განაწყენებული არ დარჩეს, შესაძლებელია. არასდროს არ ვაკრიტიკებ ჩემს გუნდს და არც არასდროს გავაკრიტიკებ, მაგრამ მოიკითხონ ეს ამბავი, ვინ აკეთებს ამას.

"რ": თუკი თქვენი გუნდის წევრი გასაკრიტიკებელია, არ გააკრიტიკებთ?

ზ.კ.: თუკი ჩემს ამ გამოხმაურებას შედეგი კიდევ არ მოჰყვება, შემდეგ შემიძლია ვიღაცები კონკრეტულად გავაკრიტიკო.

"რ": მოსახლეობის პრეტენზიების იგნორირება კატეგორიულად მიუღებელიაო, - ამბობთ. თუმცა, ჩვენ ბევრგან გვინახავს რაღაც საკითხებზე საზოგადოების ნაწილის პრეტენზია და ხელისუფლების მხრიდან იგნორირება. მაგალითად, პანორამის პროექტს ბევრი ეწინააღმდეგება და ამ შემთხვევაში თქვენ ვის გვერდით ხართ?

ზ.კ.: პანორამისა და ამ პროექტის ერთმანეთთან შედარება აბსოლუტურად წარმოუდგენელია. პანორამა არანაირად არ ეხება უკვე არსებულ კორპუსებს და მოსახლეობას.

აქ კი პირდაპირ ლაპარაკია იმაზე, რომ ამ ახალი მშენებლობის დაწყება ირგვლივ არსებული კორპუსების საფუძვლიანი შესწავლის გარეშე დაუშვებელია.

"რ": თქვენი "ფეისბუკის" სტატუსი კოალიციაში დაპირისპირებად არ აღიქვეს?

ზ.კ.: არავითარ შემთხვევაში. დღეს პრემიერ-მინისტრს ოზურგეთში შევხვდი და ვესაუბრე. მანაც კრიტიკულად შეხედა ამ პრობლემას. ამდენი ხანი ყურადღება როგორ არ მოგაქციესო, - გაუკვირდა და აუცილებლად დავავალებ ვისაც საჭიროა იმას, რომ რეაგირება მოჰყვესო.

დავით უსუფაშვილიც, რომელიც ამ რაიონის მაჟორიტარია, საქმის კურსშია. ჩემს განცხადებას რეაგირება მოჰყვა და იმედი მაქვს, რომ ამას შედეგი მოჰყვება.

"რ": რადგან ოზურგეთში ხართ, მინდა გკითხოთ, შსს-მ "ნაციონალური მოძრაობის" 3 აქტივისტი დააკავა იმის გამო, რომ მათ კორპუსის სახურავზე გააკრეს ბანერი - "მატყუარა მთავრობა". თქვენს რაიონში ოპოზიციას გამოხატვის თავისუფლებისთვის რომ აკავებენ, თქვენი რეაგირება როგორი იყო?

ზ.კ.: არ მაქვს ინფორმაცია, რომ ვინმე დაიჭირეს.

"რ": ადგილობრივმა ჟურნალისტმა პრემიერს დაუსვა კიდეც შეკითხვა იმაზე, თუ რატომ დააკავეს ეს 3 აქტივისტი და ის პოლიციამ ძალით გაიყვანა. ესეც არ გინახავთ?

ზ.კ.: მე შევესწარი მომენტს, როდესაც არა ჟურნალისტი, არამედ "ნაციონალური მოძრაობის" აქტივისტი, რომელიც ჟურნალისტობას იბრალებს და რომელიც არჩევნების დროს "რეალ ტვ"-ის დანიშნული ჟურნალისტი იყო, ცდილობდა ძალიან უხეში ფორმით მივარდნილიყო და მიემართა პრემიერ-მინისტრისათვის და მას მხოლოდ ამის საშუალება არ მისცეს. მეტი არაფერი. ხოლო ვერ დაგიდასტურებთ იმას, რომ რაიმე კრიმინალური ინციდენტი მოხდა და ვიღაცები დააპატიმრეს.

"რ": პარტიის აღმასრულებელმა მდივანმა ირაკლი კობახიძემ განაცხადა, რომ ერთ-ერთი პრობლემური რაიონია ოზურგეთი, სადაც საკრებულოში "ოცნება" მყარ უმრავლესობას არ ფლობსო. რამდენად საკმარისი რეიტინგი აქვს კოალიციას თქვენს ქალაქში?

ზ.კ.: რაც მართალი - მართალია, კოალიციის რეიტინგი გამოჩნდა არჩევნების დროს. გურია საერთოდ ძალიან პოლიტიზებული რეგიონია. აქ იმდენად დიდია პოლიტიკური პროცესების მიმართ ინტერესი, რომ რაც ხდება, გასაკვირი არც არის.

თუმცა, ეს არ ნიშნავს იმას, რომ "ქართულ ოცნებას" საკმარისი მხარდაჭერა არ აქვს. ამას მომავალი არჩევნებიც დაადასტურებს. თუმცა, შიდა პარტიული სამუშაოები აუცილებლად ჩასატარებელია.

"რ": პარტიული მუშაობის გაძლიერება ერთია, მაგრამ მოსახლეობა ხელისუფლებით მაინც უკმაყოფილოა და ამის ობიექტური მიზეზებიც არსებობს - იგივე ლარის დევალვაცია, გაძვირებული ცხოვრება თუ ყურძნის დაბალი ფასის გამო გაბრაზებული მევენახეები და ა.შ. ეს ყველაფერი ალბათ ისედაც დააკარგვინებს კოალიციას ხმებს.

ზ.კ.: ახლა თქვენ ძალიან სერიოზულ თემებს შეეხეთ, განსაკუთრებით ლარის კურსის ცვალებადობას, რომელიც ერთ ინტერვიუში გაკვრით განსახილველი საკითხი არ არის. რაც შეეხება კახეთს, მიუხედავად იმისა, რომ პრობლემაა, მაინც ვფიქრობ, რომ ეს თავიდან ბოლომდე მართული პროცესია და გარწმუნებთ, რომ უახლოეს დღეებში მოგვარდება.

"რ": მართული პროცესია ის, როდესაც მევენახეების ნაწილი ივანიშვილის მიერ გაცემულ დაპირებას ახსენებს ხელისუფლებას, ყურძენი ერთ ლარზე ნაკლები არ უნდა ღირდესო?

ზ.ა.: არ მინდა ამ თემაზე საუბარი. იმიტომ კი არა, რომ არ მაღელვებს. მაღელვებს და ვგულშემატკივრობ ყველა დაინტერესებულ მხარეს. თუმცა ვფიქრობ, რომ ეს საკითხი მარტივად ხელწამოსაკრავი არ არის და ძალიან ბევრი არგუმენტი არსებობს იმისათვის, რომ მთავრობის დღევანდელი დამოკიდებულება ამ პროცესისადმი სამართლიანია.

შეიძლება ითქვას, პირიქით, ძალიან ბევრია გამუქებული და ძალიან ბევრი არასამართლიანი კრიტიკა გვესმის დადგმული ინტერვიუებიდან. იმდენი, რამდენიც საქართველოში სოფლის მეურნეობის აღორძინებისათვის კეთდება, არც წარმომიდგენია, რომ სადმე გაკეთებულიყოს და ამის გამო ჩვენ ძალიან სერიოზულად გვაკრიტიკებენ კიდეც.

ის, რომ ტარიფები თურმე მთავრობამ უნდა დაადგინოს, სწორი დამოკიდებულება არ არის. თუკი პრობლემა დგას, მისი მოგვარების გზები უნდა ვეძებოთ და ულტიმატუმებით არ უნდა ვეცადოთ ხელისუფლების დაშანტაჟებას და იძულებას, რომ ისეთ დათმობებზე წავიდეს, რაც ქვეყნის ეკონომიკას დაარტყამს.