"საქართველოს შეერთება ნატოს სწრაფი რეაგირების ძალებთან პირდაპირი განაცხადია იმის, რომ საქართველოს შეიარაღებული ძალები უკვე მზად არის ნატოს წევრობისთვის. ანუ მომავალში როდესაც დადგება პოლიტიკური საკითხი, მაშინ საქართველო უკვე მზად იქნება", - ამბობს "რეზონანსთან" საუბრისას პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილი.

დეპუტატი ამბობს, რომ პრემიერმაც და პრეზიდენტმაც გაეროში სწორი აქცენტები დასვეს. პრემიერის კრიტიკას ოპონენტების მხრიდან კი ვიწრო პარტიულ ინტერესებს უწოდებს.

ირაკლი სესიაშვილი: ნატოს სწრაფი რეაგირების ძალებთან საქართველოს შეერთება პირდაპირ იმის აღიარებაა, რომ საქართველოს შეიარაღებული ძალები ნატოს სტანდარტის მატარებელია.

მეტსაც გეტყვით, სულ რამდენიმე ხნის წინ გერმანიაში იყო უმაღლესი დონის შეხვედრები - ათამდე ამერიკელი გენერალი იყო ჩამოსული. ნატოს გენერალიტეტიდან ერთ-ერთმა პასუხისმგებელმა პირმა მოხსენება გააკეთა და მას დაუსვეს შეკითხვა საქართველოს შესახებ, თუ რამდენად მზად არის, რომ საქართველო ნატოში გაწევრიანდეს.

თავისთავად ცხადია, რომ ნატოში გაწევრიანება პოლიტიკური გადაწყვეტილებაა. როგორც სამხედრო პირს თუკი შემეკითხებიან, თუ რამდენად მზადაა საქართველო თავდაცვის რეფორმის თვალსაზრისით ნატოში გაწევრიანებისთვის, ჩემი პასუხი იქნება, რომ თუ ვინმე ამისთვის მზად არის, ეს პირველ რიგში საქართველოა. მგონი, ამით ყველაფერია ნათქვამი. ის, რომ ნატოს ძალებთან ერთ-ერთი ყველაზე თავსებადი საქართველოა, ამის ნიშანი იყო სწორედ ნატოს სწრაფი რეაგირების ძალებთან შეერთება. თანაც ეს მოხდა ძალიან მოკლე ვადაში, ძალიან დაჩქარებული ფორმით.

"რეზონანსი": დაჩქარება ქართული მხარის მოთხოვნა იყო?

ი.ს: დაჩქარება მოხდა არა იმიტომ, რომ ვინმეს ეჩქარებოდა, არამედ ეს მოხდა იმის გამო, რომ ჩვენი შეიარაღება და თავდაცვის რეფორმები ყველაზე წარმატებულად არის აღიარებული.

"რ": ანუ ბოლო წლებში გატარებულმა რეფორმებმა თავისი შედეგი გამოიღო?

ი.ს: რა თქმა უნდა. ამაში დიდი წვლილი მიუძღვით ჯარისკაცებსა და ოფიცრებს. ვისარგებლებ შემთხვევით და მათ მადლობას გადავუხდი თქვენი საშუალებით. ჩვენი სამხედროები ავღანეთში ერთ-ერთი ყველაზე გამორჩეულები არიან. ამერიკელებზე, ბრიტანელებზე თუ სხვა ქვეყნის ჯარისკაცებზე არანკლებად მომზადებულები არიან.

"რ": ამას აშშ-ის ელჩმაც გაუსვა ხაზი ჩვენი ჯარისკაცის ვასილ ყულჯანიშვილის დაკრძალვაზე, თუმცა სკეპტიკური მოსაზრებები გამოჩნდა გარკვეულ პოლიტიკურ ძალებში, რომ რატომ უნდა იღუპებოდეს ქართველი ჯარისკაცი უცხო მიწაზე. რას უპასუხებთ მათ?

ი.ს: ძალიან მტკივნეულია, როდესაც ჩვენი ჯარისკაცები იღუპებიან. მაგრამ ისინი გმირულად იღუპებიან. ისინი მიზნის გარეშე ნამდვილად არ იღუპებიან, ეს მიზანი ჩვენი ქვეყნის მომავალი და უსაფრთხოებაა. თუ დავაკვირდებით სამხედრო-პოლიტიკურ სიტუაციას, დავინახავთ რომ მომავალში უზრუნველვყოფთ ჩვენი ქვეყნის უსაფრთხოებას.

დღევანდელი გლობალური პროცესების ნაწილია სწორედ ის, რომ გვიწევს ტერორიზმთან ბრძოლა. საბოლოო ჯამში ეს ჩვენი ქვეყნის უსაფრთხოების განმტკიცებაში დაგვეხმარება. ეს ლამაზი სიტყვები არ არის, ეს აბსოლუტური რეალობაა.

ძნელია პატარა ქვეყანამ ამხელა კონტრიბუცია შეიტანოს მსოფლიოში, მაგრამ გარდა იმისა, რომ ცივილიზებული სამყაროს წევრობის მზაობას ვადასტურებთ, ასევე ჩვენი ჯარისკაცები დიდ გამოცდილებას იღებენ.

"რ": ნატოს სწრაფი რეაგირების ძალებთან შეერთება გვაახლოვებს ნატოსთან?

ი.ს: ეს ფაქტობრივად პირდაპირი განაცხადია იმის, რომ საქართველოს შეიარაღებული ძალები უკვე მზად არის ნატოს წევრობისთვის. ანუ მომავალში, როდესაც დადგება პოლიტიკური საკითხი, მაშინ საქართველო უკვე მზად იქნება. საუბარი მაქვს იმაზე, რომ მაშინ ხდება სამხედრო ანალიზიც. მაშინ საქართველოს ეს ეტაპი უკვე გავლილი ექნება. ამიტომ მიგვიღეს სწრაფი რეაგირების ძალებში.

"რ": ირაკლი ღარიბაშვილმა გაეროში პირველსავე გამოსვლაზე არ ისაუბრა რუსულ აგრესიაზე და ოკუპაციის თემაზე და ამის გამოც გააკრიტიკეს ოპონენტებმა...

ი.ს: პრემიერის გაეროში გამოსვლები ძალიან ეფექტური იყო. ჩვენს ოპონენტებს უნდათ კრიტიკა კრიტიკისთვის. იქ, სადაც ოპონენტებს არგუმენტები არ ჰყოფნით, მაშინ იყენებენ ტერმინებს - უფრო ეფექტური, მაგრამ უფრო ეფექტური რა არის, ეს მათ თავადაც არ ესმით.

საერთაშორისო საზოგადოებამ პრემიერისა და პრეზიდენტის გამოსვლებს უმაღლესი შეფასება მისცა. ყველა მიმართულებით პრეზიდენტმაც და პრემიერმაც სწორი აქცენტები დასვეს, მაგრამ ზოგიერთს არ ესმის რაზე უნდა ყოფილიყო ფოკუსირებული ესა თუ ის გამოსვლა. ჰგონიათ რომ ყველგან ყველაფერზე უნდა ილაპარაკონ. სწორედ აქ ჩანს მათი დილეტანტიზმი.

ცდილობენ საზოგადოების შეცდომაში შეყვანას და ვითარებას წარმოაჩენენ მცდარად. ისინი მოქმედებენ ვიწრო პოლიტიკური ინტერესებით და ჩვენს ქვეყანას იმიჯს ულახავენ.

"რ": პრეზიდენტი დაეთანხმა ამერიკელ ჟურნალისტს, რომელმაც აღნიშნა რომ საქართველო ამერიკის რადარებიდან გამქრალია. თქვენც ფიქრობთ, რომ საქართველომ ამერიკისთვის პრიორიტეტი დაკარგა?

ი.ს: მე არ ვიცი ჟურნალისტის ეს კითხვა რას ეფუძნებოდა, მაგრამ მე შემიძლია გითხრათ, რომ თავდაცვის სფეროში არნახულ წარმატებას მივაღწიეთ და ამ სფეროში ამერიკასთან ყველაზე აქტიური თანამშრომლობა გვაქვს. იცით, რომ ნატო-საქართველოს ცენტრი გაიხსნა, ვთანამშრომლობთ შეიარაღების თვალსაზრისით და ა.შ.

ამერიკაში მომავალ წელს არჩევნებია, საარჩევნო წელს ამერიკა საგარეო პოლიტიკის თვალსაზრისით პაუზას იღებს, შესაძლოა ამით იყოს ნაკარნახევი ჟურნალისტის კითხვა. პრეზიდენტი რატომ დაეთანხმა, არ ვიცი, ეს ალბათ ბატონ მარგველაშვილს უნდა ჰკითხოთ.

"რ": ბოლო დღეების სკანდალურ თემად იქცა ე.წ. ნარუშინოვკის თემა. რას იტყვით ამაზე?

ი.ს: "ნარუშინოვკა" თავისი არსით ოპერატიული საქმიანობისთვის საჭიროა, მაგრამ მან წლების განმავლობაში ძალიან მახინჯი სახე მიიღო. წინა ხელისუფლების დროს ამაზე ათჯერ მეტი "ნარუშინოვკა" იყო გაცემული. ნათესავებზე, მეგობრებზე და ა.შ.

ჩვენ როდესაც მოვედით ხელისუფლებაში, ეს რიცხვი იმ წელსვე შევამცირეთ. დავიწყეთ ამ საკითხის რეგულირება. სამწუხაროდ ამ თემის ბოლომდე მიყვანა ვერ მოხერხდა. ვფიქრობ, რომ შს მინისტრმა სწორი გადაწყვეტილება მიიღო, როდესაც მთლიანად გააუქმა 2009 წელს გაცემული ეს საბუთები.

მე შევხვდები გიორგი მღებრიშვილს და მექნება საშუალება, რომ ინფორმაცია მივიღო და ამის შემდეგ დეტალურად შეგვეძლება საუბარი.