"რესპუბლიკური" პარტიისა და დედაქალაქის საკრებულოს წევრი დავით ზურაბიშვილი აცხადებს, რომ ხელისუფლება საერთაშორისო საზოგადოებასა და საკუთარ მოქალაქეებს ვერ არწმუნებს იმაში, რომ ის "რუსთავი 2"-თან მიმდინარე პროცესებში არ ერევა. "რეზონანსთან" ინტერვიუში ის აცხადებს, რომ ხელისუფლების წარმომადგენლების მხრიდან ოპოზიციური ტელეარხის გაუთავებელი კრიტიკის გამო საზოგადოების თვალში ნაკლებად დასაჯერებელი ხდება, რომ ქიბარ ხალვაში დამოუკიდებლად მოქმედებს.

ზურაბიშვილი თვლის, რომ ხელისუფლება "ნაციონალურ მოძრაობას" ამ თემის პოლიტიზების საშუალებას აძლევს, რადგანაც ისინი "რუსთავი2"-ის მიმართ პანიკურ დამოკიდებულებას ავლენენ, რაც საერთაშორისო ორგანიზაციებს გარკვეულ ეჭვს უჩენს. მისივე თქმით, ამ მხრივ მთავრობამ პოლიტიკა უნდა შეცვალოს, რადგანაც მტკიცებულების ტვირთი ხელისუფლებას აკისრია.

"რეზონანსი": როგორ ფიქრობთ, "რუსთავი 2"-ის მიმართ დაწყებული პროცესები ხელისუფლებაზე როგორ გავლენას მოახდენს?

დავით ზურაბიშვილი: რა თქმა უნდა, ყველანაირად უარყოფითად იმოქმედებს. როდესაც ასეთი სიტუაციაა, ხელისუფლება და ყველა მისი შტო მობილიზებული უნდა იყოს იმაზე, რომ სასამართლოზე ზეწოლის ეჭვი არავის დარჩეს, რადგანაც ყველა უნდა დარწმუნდეს, რომ ეს მხოლოდ და მხოლოდ კერძო სუბიექტთან მიმდინარე დავაა.

ჩვენი ხელისუფლების მთელი ძალისხმევა ამისკენ უნდა იყოს მიმართული. სამწუხაროდ, სრულიად სხვა რაღაცას ვხედავთ. ხელისუფლების წარმომადგენლები ძირითადად მობილიზებული არიან იმისკენ, რომ ყველას დაუმტკიცონ, თუ "რუსთავი 2", როგორი პარტიული ტელევიზიაა.

"რ": ფიქრობთ, რომ საზოგადოებას შთაბეჭდილება ექმნება, რომ ქიბარ ხალვაში დამოუკიდებლად არ მოქმედებს და მას მხარს ხელისუფლება უჭერს?

დ.ზ.: რა თქმა უნდა, საზოგადოებას კითხვები ყოველთვის უჩნდება. მტკიცებულების ტვირთი ხელისუფლებას აწევს. ტყუილად არაფერი ხდება. როდესაც ადმიანს სამი წლის მანძილზე არაფერი არ გაუპროტესტებია და ქონებას ახლა ითხოვს, ეს ცოტა საეჭვოა. თანაც ეს იმ ფონზე ხდება, როდესაც ხელისუფლება მუდმივად იმაზე საუბრობს, რომ ეს ტელევიზია ცუდია. ეს ყველაფერი კი ძალაუნებურად კითხვებს აჩენს.

ამიტომაც ნიკა გვარამიას საბაბი აქვს და ამ თემით მანიპულირებას ახდენს. არის საკითხები, რაც პოლიტიკური თამაშის წესებში არ ჯდება. მაგრამ, სამწუხაროდ, ამის შედეგი ის არის, რომ ამ ტელევიზიას ხან აშშ და ხან სხვადასხვა საერთაშორისო ორგანიზაციები უცხადებენ მხარდაჭერას.

"ნაციონალური მოძრაობის" დროს, როდესაც მედიაზე კონტროლი და ზეწოლა სრულიად ხორციელდებოდა, მათ პოლიტიკური თამაშის წესები ისე კარგად იცოდნენ, რომ საზღვარგარეთ ამის დამამტკიცებელი საბუთის გატანა ძალიან რთული იყო. ესენი კი ხმამაღლა გაჰყვირიან, რომ ცუდი ტელევიზიაა და მიკერძოებულია. ამის გამო ხელისუფლება საერთაშორისო ორგანიზაციებს ვერ არწმუნებს, რომ მედიაზე ზეწოლა არ ხორციელდება, ეს კი ჩვენი დიდი მინუსია.

"რ": ხელისუფლებამ როგორ უნდა დაამტკიცოს, რომ ის ამ საქმეში გარეული არ არის?

დ.ზ.: ძალიან მარტივად. თუკი ხელისუფლება სასამართლოზე ზეწოლას ახდენს, ეს არ დაიმალება და ადვილად გამოაშკარავდება. ამიტომაც ხელისუფლება მაქსიმალურად უნდა ეცადოს, რომ ამ პროცესების მიმდინარეობისას კითხვები არავის დარჩეს.

სასამართლო აუცილებლად ძალიან გამჭვირვალედ უნდა წარიმართოს. თავად ხელისუფლების ინტერესში უნდა შედიოდეს, რომ საზოგადოებას ამ საკითხთან დაკავშირებით მაქსიმალურად ბევრი ინფორმაცია მიაწოდოს.

დავუშვათ "ნაციონალური მოძრაობა" ამ თემის პოლიტიზებას ახდენს და ამას ეხმაურებიან ამერიკის საელჩო და ევროსაბჭოს წარმომადგენლები. ხელისუფლება ვალდებულია მათთან მაქსიმალური კონტაქტი იქონიოს და ყველა კითხვაზე ამომწურავი პასუხი გასცეს, რასაც ამ ხელისუფლებისგან მე ვერ ვხედავ. ამიტომაც არის ამხელა სკანდალი ატეხილი. სხვაგვარად ამ თემას რეზონანსი არ მოჰყვებოდა.

"რ": "ნაციონალური მოძრაობა" აცხადებს, რომ წინასაარჩევნოდ დამოუკიდებელ მედიაზე მიზანმიმართული ზეწოლა ხორციელდება. თქვენ ამის ნიშნებს ვერ ხედავთ?

დ.ზ.: არჩევნებამდე ერთი წელია დარჩენილი. თუმცა ფაქტია, რომ ამას "ნაციონალური მოძრაობა" და "რუსთავი 2"-ის ჟურნალისტები ამტკიცებენ. ეს არის მათ მიერ გაბერილი თემა და პოლიტიკური ბრალდება, რომელიც შეესაბამება თუ არა სიმართლეს, ამას სასამართლოს გადაწყვეტილება დაადგენს. მანამდე ამაზე საუბარი ძალიან რთულია.

თუმცა, საერთაშორისო ორგანიზაციის წამომადგენელს როდესაც უმტკიცებ, რომ ეს ტელევიზია პარტიულია და არა დამოუკიდებელი, აქ უკვე ისინი ეჭვის თვალით გიყურებენ და ვერ ხვდებიან რას ამბობს.

შეფასებები ხელისუფლების საქმე არ არის. რა თქმა უნდა, "რუსთავი 2" "ნაციონალური მოძრაობის" ზეგავლენის ქვეშ მყოფი ტელევიზიაა, მაგრამ ეს არ ნიშნავს, რომ ის დამოუკიდებელი არ არის. დამოუკიდებელი ტელევიზია ნიშნავს სახელმწიფო გავლენისგან თავისუფალს.

არ არსებობს აბსოლუტურად დამოუკიდებელი მედია საშუალება, ეს მსოფლიოს ნებისმიერ ქვეყანაში ასეა. "ნაციონალური მოძრაობის" გავლენა ამ ტელევიზიაზე ისე უნდა მივიღოთ, როგორც ფაქტი. კი, ბატონო, იყოს მაგრამ ამაზე ხელისუფლების მხრიდან ასეთი ნევროზული რეაქციები არ უნდა იყოს, რასაც მერე თავად "რუსთავი 2" გადასცემს და ხალხსაც სხვა შთაბეჭდილება რჩება.

ეს ტელევიზია საზოგადოებისთვის ინფორმაციის მიღების ერთ-ერთი წყარო არ არის და არსებობს სხვა უამრავი მედია, რომლიდანაც რადიკალურად განსხვავებული ინფორმაციის მიღება შეუძლიათ. ამიტომაც ხელისუფლების წარმომადგენლები ძალიან დიდ შეცდომას უშვებენ, როდესაც მის არსებობას ამხელა ყურადღებას უთმობენ.

"რ": თქვენ ფიქრობთ, რომ "რუსთავი 2"-ის საკითხის პოლიტიზებას თავად ხელისუფლება ახდენს?

დ.ზ.: რა თქმა უნდა, ჩვენი ხელისუფლებისთვის სამწუხაროდ "ნაციონალურ მოძრაობასთან" ურთიერთობა მთავარ და გადამწყვეტ საკითხად იქცა, ხოლო ეს ბრძოლა პირდაპირ დაკავშირებულია "რუსთავი 2"-თან.

მეც და "რესპუბლიკური" პარტიის სხვა დანარჩენი წევრებიც მუდმივად ვამბობთ, რომ არ შეიძლება ამ პარტიასთან დაპირისპირება ჩვენი ხელისუფლების მთავარ თემას წარმოადგენდეს.

ეს რიტორიკა და განწყობა თავად საზოგადოებაზეც მოქმედებს და მათ დაპირისპირებისკენ უბიძგებს. ხოლო საერთაშორისო დონეზე ეს საერთოდ კოშმარია. ამიტომაც ყველაფერს პოლიტიკურად მოტივირებულის სარჩული ედება. მე რომ მათ ადგილას ვიყო, მეც ვერაფერს გავიგებდი. ყველაფერზე ხომ არ შეიძლება ამ ხალხის ხსენება?

"რ": თქვენი აზრით, "რუსთავი 2"-ის თემა საზოგადოებაში დაპირისპირებას გამოიწვევს?

დ.ზ.: აქ ყველაფერთან ერთად მეორე მთავარი საკითხია თავად ნიკა გვარამია როგორ იქცევა. ხშირად მისი გამოსვლები ისტერიულია. ირონიას იწვევს ის განცხადებები, რომ "რუსთავი 2" დამოუკიდებელი და მართალი ტელევიზიის ფალგმანია. ალბათ ყველას ძალიან კარგად ახსოვს წინა ხელისუფლების დროს ვინ სად იყო. ან ეს ტელევიზია რა სიუჟეტებს დგამდა. "იმედის" დახურვაში თავად ნიკა გვარამია მონაწილეობდა. ასე რომ, მის მიერ ეს საწყალისა და ჩაგრულის როლის თამაში ცოტა სასაცილოა. ამიტომაც არ მგონია, რომ "ნაციონალური მოძრაობის" მხარდამჭერების გარდა ვინმემ თავი გაიგიჟოს.

თუმცა, თუკი მის დახურვას რეალურად საფრთხე დაემუქრება, მე დარწმუნებული ვარ, საზოგადოების ჯანსაღო ნაწილი ამას გააპროტესტებს. თუმცა, როგორც ვთქვი, ჯერ-ჯერობით ეს ყველაფერი მხოლოდ სასამართლოს გადაწყვეტილების შემდეგ გამოჩნდება.

"რ": წინა ხელისუფლების დროს "იმედში" განვითარებულ მოვლენებსა და დღევანდელ "რუსთავი 2"-თან მიმდინარე პროცესებში საერთოს ხედავთ?

დ.ზ.: მე ვფიქრობ, რომ ჯერ-ჯერობით არ არის. იმიტომ, რომ ჯერ ერთი "იმედი" არ იყო კონკრეტული პოლიტიკური პარტიის ზეგავლენის ქვეშ მყოფი მედია საშუალება. "იმედი" ნამდვილად აშუქებდა იმას, რაც ქვეყანაში რეალურად ხდებოდა. მის წინააღმდეგ მთელი სახელმწიფო მანქანა სრულად იყო მომართული.

აღარ ვსაუბრობ იმაზე, რომ სასამართლოს მეშვეობით მთელი ტელევიზიის წილები გადაიფორმეს. ამიტომაც პარალელის გავლება ამ ორ მედია საშუალებას შორის ძალიან გამიჭირდება.

"რუსთავი 2"-ის მიმართ მთელი სამი წლის განმავლობაში ხალვაშს პრეტენზია არ გამოუთქვამს, ხოლო შემდეგ მოულოდნელად სასამართლოში ჩივის და ყველაფერს აყადაღებენ. ვფიქრობ გარკვეული ეჭვი სწორედ ამ ფაქტმა გამოიწვია.

რაც შეეხება გვარამიას განცახდებას, რომ ყადაღის დადება ტელევიზიის დახურვას ნიშნავს, ეს სრული აბსურდია. ეს უბრალოდ გვარამიას მიერ ატეხილი ისტერიკაა. აქ საუბარია იმაზე, რომ მათ უბრალოდ წილის გაყიდვა ეკრძალებათ. თუკი გამოცხადებულ ანგარიშზე ჩვეულებრივ ადამიანებს ფულის გადარიცხვა შეუძლიათ, ზუსტად ასევე შეუძლიათ მის სპონსორებსაც. ასე რომ, ძალიან ტანჯულის მანტიის მორგებაც ზედმეტი მგონია.