ძალიან აქტიურად ვმუშაობთ სკოლებთან, უმაღლეს სასწავლო დაწესებულებებთან, რომ არ მოხდეს მათი პოლიტიზირება, მცდელობები არის, - ამის შესახებ საქართველოს განათლებისა და მეცნიერების მინისტრმა ალექსანდრე ჯეჯელავამ ჟურნალისტებს განუცხადა.
"გასაგებია, რომ წინასაარჩევნო პირობებია და ბევრი მხრიდან იქნება სურვილი, ჩვენი სკოლა და უმაღლესი სასწავლებლები პროცესში ჩაერთონ. ჩვენ ყველანაირად მოვუწოდებთ და ვცდილობთ, რომ ასე არ მოხდეს.
"პრემიერის ინიციატივას ცალსახად ვეთანხმებით, რადგან გვგონია, ქართველებმა უნდა მოვახერხოთ, არჩევნები მიმდინარეობდეს მშვიდად, საერთო ფასეულობებზე დაყრდნობით და არა დისკრედიტაციის ფონზე, მით უმეტეს, ადმინისტრაციული რესურსის გამოყენება, რა თქმა უნდა, დაუშვებელია", - აღნიშნა ალექსანდრე ჯეჯელავამ.
რაც შეეხება პოლიტიზირების მცდელობებს, მინისტრის განმარტებით, ბოლო დროს ერთ სკოლაში ვიდეომასალის ჩვენების და მეორე სკოლაში პოლიტიკური მოღვაწის ჩართვის შემთხვევა იყო. ჯეჯელავას განცხადებით, ეს წინასაარჩევნო პროცესში აბსოლუტურად დაუშვებელი ხერხებია.
საგანმანათლებლო დაწესებულებებში პოლიტიზირების მცდელობებთან დაკავშირებით განათლების ექსპერტ ზურაბ ვახანიას მიაჩნია, რომ წინასაარჩევნოდ ეს პროცესები თავს იჩენს, ამასთან, მისი თქმით, ერთადერთი, რასაც კანონი კრძალავს, ის არის, რომ პოლიტიკური თემების გაშუქება უშუალოდ სკოლებში დაუშვებელია, სხვა მხრივ არანაირი შეზღუდვა არ არსებობს, ამიტომაც მოსალოდნელია, რომ თუნდაც უმაღლეს სასწავლებლებში პოლიტიკურმა პარტიებმა გარკვეული პროცესების პოლიტიზირება მოახდინონ.
წინასაარჩევნო პერიოდში შესაძლებელია შეეცადონ თბილისის სახელმწიფო უნივერსიტეტში მიმდინარე პრობლემების წინ წამოწევას, ეს, რა თქმა უნდა, "ნაციონალური მოძრაობის" წევრები იქნებიან, თუმცა რამდენად გამოუვათ ეს, არ ვიცი, მაგრამ ბუნებრივია, ამ თემით მანიპულირებას შეეცდებიან", - გვითხრა ზურაბ ვახანიამ.
"ელით თუ არა წინასაარჩევნოდ საგანმანათლებლო დაწესებულებებში პოლიტიზირებულ მცდელობებს?" - ამ კითხვით "რეზონანსმა" საზოგადოების ცნობილ წარმომადგენლებს მიმართა.
ნუცა ჯანელიძე (მუსიკოსი): "ლექტორებისგან გარკვეული პოლიტიზირების მცდელობები არ მგონია იყოს. თუ სტუდენტებს რამე უთხრეს და მოუწოდეს, ეგ არ ვიცი.
პოლიტიკური ძალების მხრიდან კი მსგავსი ქმედებები არ მგონია, განხორციელდეს, რადგან ყველამ იცის, რომ მაშინვე გააშუქებენ ტელევიზიაში და არ მგონია, უღირდეთ მსგავსი ქმედებები. ამიტომ, მათი მხრიდან უმაღლეს სასწავლებლებში რამე პოლიტიზირებულ მცდელობებს გამოვრიცხავ."
ზაზა ხუციშვილი (მუსიკოსი): "სკოლებში მსავს ქმედებებს აბსოლიტურად გამოვრიცხავ, სტუდენტებს რაც შეეხება, ისინი ზრდასრული ადამიანები არიან. რა თქმა უნდა, ზეგავლენის მოხდენა დაუშვებელია, მაგრამ, თავის მხრივ, გარკვეულ აქტიურობას ვერავინ დაუშლის.
სტუდენტები, ასე თუ ისე, ყოველთვის ჩართული იყვნენ პოლიტიკურ პროცესებში. მთავარი ის არის, რომ რომელიმე პოლიტიკური პარტიის მხრიდან მათი გამოყენება არ მოხდეს, რაც დაუშვებელია.
რაც შეეხება სკოლებს, აქ ყოველგვარი პოლიტიკური ქმედება და განცხადება დაუშვებელია. სკოლის მოსწავლე არავითარ შემთხვევაში არ უნდა იყოს ჩართული, არც ინფორმაციის მიწოდებით, არც ფილმების ჩვენებით.
ბევრისგან გამიგონია, რომ სტუდენტური თვითმმართველობები თანამედროვე კომკავშირის ვარიანტია, იმართებიან პოლიტიკური პარტიებისგან და აქვთ გარკვეული შანსები, რომელთა დაკარგვაც ალბათ არ უნდათ.
ვთვლი, რომ განათლების მინისტრის შეცვლის ერთ-ერთი მიზეზი ალბათ ეს იყო. მართალია, უნივერსიტეტი დამოუკიდებელი ორგანოა, მაგრამ როდესაც იგრძნობა გარკვეული პოლიტიკური პარტიების გავლენის მცდელობები, ამ დროს სამინისტრო უფრო აქტიურად უნდა ჩაერთოს.
იმედი მაქვს, რომ თავს შეიკავებენ და ყველა არა ვიწრო, არამედ ქვეყნის ინტერესებიდან გამოვა, თუმცა ამის დიდი იმედი არ მაქვს."
თაკო ჩარკვიანი (პუბლიცისტი): "რა თქმა უნდა, შესაძლებელია, თუმცა ამის მარეგულირებელი სისტემის შექმნა თავად სკოლებსაც შეუძლიათ. რამდენად მოხდება ამის რეალურად განხორციელება, ძნელი სათქმელია, რადგან თავად საზოგადოება ზედმეტად პოლიტიზირებულია.
ყველაფერი ალბათ უფრო გამწვავდება, თუმცა განათლების სისტემამ თავად უნდა დაარეგულიროს მოვლენები, მაგრამ აკრძალვა, ალბათ კარგი არ იქნება, რადგან ეს უარეს შედეგს მოგვცემს.
თუმცა, ხელისუფლებას ის ვერ მოუხერხებია, პირდაპირ ეთერში ოკუპაციის კანონი არ დაარღვიონ, ამ ქმედებით პირდაპირ ირღვევა საქართველოს კონსტიტუცია, როდესაც გამოდიან და ოკუპაციის პოპულარიზაციას ეწევიან, ეს ვერ დაურეგულირებიათ და რა გითხრათ, ალბათ მეტ-ნაკლებად შეიძლება ისიც, რომ დაარეგულირონ წინასაარჩევნო პერიოდში პოლიტიზირების მცდელობებიც."
გია ბუღაძე (ფერმწერი): "მე დარწმუნებული ვარ, რომ ასე იქნება. ყველაფერი ძალიან პოლიტიზირებულია, მაგრამ ყველაზე მეტად იმის მეშინია, რომ გააქტიურდებიან რუსული სპეცსამსახურები. მე მაქვს შეხება გარკვეულ უნივერსიტეტებთან, სადაც ჩანს მათი მუშაობა. ეს ფაქტორი საკმაოდ გაძლიერებულია და მის უკან ვფიქრობ, რომ ნამდვილად დგას რუსული სპეცსამსახურების ჯარი."
სტატიების ნახვა შეგიძლიათ რუბრიკაში "ყველა სტატია"
ყველა ახალი ამბის ნახვა შეგიძლიათ ამ ბმულზე
საინტერესო ვიდეოები შეგიძლიათ იხილოთ რუბრიკაში "ყველა ვიდეო"
ბოლო ამბების ნახვა შეგიძლიათ ამ ბმულზე