შავი ზღვის გარკვეულ ტერიტორიაზე, ფეკალური მასების ზღვაში ჩადინება ისევ პრობლემას წარმოადგენს. კერძოდ, ბათუმის ზოგიერთ უბანში არსებული შენობა-ნაგებობების საკანალიზაციო სისტემა პირდაპირ ზღვას უერთდება, რაც ტურისტების უკმაყოფილების მიზეზია. "გუშინ ჩამოვედით, ერთ-ერთ სასტუმროში გავჩერდით, მაგრამ წყალში ჯერ კიდევ არ შევსულვართ. ჩვენი თვალით ვნახეთ საკანალიზაციო სისტემა, რომელიც ზღვას უერთდება. ვაპირებთ, რომ სასტუმრო გამოვიცვალოთ", - ამბობს "რეზონანსთან" ადგილობრივი ტურისტი.