სკოლას უფლება აქვს - მშობლებთან შეთანხმებით მოსწავლეებს დამატებითი ფასიანი საგანმანათლებლო მომსახურებაც შესთავაზოს. თუმცა, მას არ უნდა ასწავლიდეს ამავე სკოლაში დასაქმებული მასწავლებელი, არ უნდა ჰქონდეს საგაკვეთილო სახე.

რაც შეეხება მოსწავლეთა შეფასებას, ის იქნება ორნაირი განმსაზღვრელი და განმავითარებელი. განმსაზღვრელი შეფასება მოსწავლის მიღწევის დონეს საგნობრივი სასწავლო გეგმის შედეგებთან მიმართებაში ადგენს, ხოლო განმავითარებელი შეფასება თითოეული მოსწავლის განვითარების დინამიკას და მიმართულია სწავლის ხარისხის გაუმჯობესებაზე.

მოსწავლის აკადემიური მოსწრება კი 10-ქულიანი სისტემით შეფასდება: მაღალი (10-9 ქულა), საშუალოზე მაღალი (7-8), საშუალო (5-6), საშუალოზე დაბალი (3-4) და დაბალი (1-2). "საქართველოს განათლების ლიგის" თამჯდომარე მანანა ნიკოლეიშვილი "რეზონანსთან" საუბრისას ამჟამად არსებულ ეროვნულ სასწავლო გეგმას აფასებს და ამბობს, რომ ის დაუყოვნებლივ უნდა შეიცვლოს, რათა სავალალო შედეგების თავიდან აცილება მოხდეს.

"როდესაც მინისტრი არსებულ სასწავლო გეგმას აკრიტიკებს და იწუნებს, ვერ ვხვდები, რა უშლის ხელს, რომ მაშინვე შეცვალოს. გამოდის, ეს მხოლოდ პოპულისტური განცხადებაა. მინისტრია და მის კრიტიკას ნორმატიული აქტის გამოცემის ბრძანებაც უნდა მოჰყვეს. "მთლიანად შესაცვლელია როგორც ეროვნული სასწავლო გეგმა, ისე საგნობრივი კონცეფციები. მაგალისთისთვის მათემაკიტა ავიღოთ, ის ხომ ნომერი პირველი საგანია და დღეს რას ასწავლიან?! არც წიგნებია ნორმალური და არც პროგრამები. იმიტომაც გვაქვს გამოცდებზე ასეთი შედეგები.

"სააკაშვილმა ჩაიდინა ის, რომ ტექნიკური მეცნიერებების, ზუსტ და საბუნებისმეტყველო, ასევე ჰუმანიტარული საგნების საათების რაოდენობა შეამცირა, რითიც ციკლთა შორის თანაფარდობა დაირღვა და ხელყოფილ იქნა ბავშვის უფლება, რომ კონკურენტუნარიანი განათლება მიიღოს. ეს ყველაფერი ეროვნული სასწავლო გეგმის ბრალია და არა მასწავლებლის, ყველაფერს მას რომ აბრალებენ. სანამ კიდევ დროა და სავალალო შედეგები არ დამდგარა, სასწრაფოდ უნდა გააუქმონ არსებული სასწავლო სქემა," - ამბობს მანანა ნიკოლეიშვილი.