ბოლო ერთი თვის განმავლობაში თბილისში ცოფის ვირუსით დაინფიცირებულ ძაღლებთან დაკავშირებული ორი შემთხვევა დაფიქსირდა. ეს ინფორმაცია „რეზონანსს" თბილისის მერიასა და ცხოველთა მონიტორინგის სააგენტოში დაუდასტურეს. მერიაში აცხადებენ, რომ ამ შემთხვევებიდან საბედნიეროდ დაკბენის ფაქტი გამოვლენილი არაა, თუმცა, მათი განცხადებით, პრევენციული ღონისძიებები უნდა გატარდეს.
„ადრე გაბრიელ სალოსის ქუჩაზე იყო, ახლა კი ქინძმარაულის ქ.N 45. საბედნიეროდ, დაკბენის ფაქტი გამოვლენილი არაა, თუმცა პრევენციული ღონისძიებები უნდა გატარდეს დადგენილი პროტოკოლის მიხედვით" - განაცხადეს თბილისის მერიაში.
„რამდენიმე დღის წინ ცოფით ინფიცირებული ძაღლი ქინძმარაულის ქუჩაზე აღმოჩნდა, მეორე კი - ბერი გაბრიელ სალოსის გამზირზე", - განუცხადეს ცხოველთა მონიტორინგის სააგენტოში „რეზონანსს".
მანმდე ქალაქის მერიამ განაცხადა, რომ მოქალაქის მიმართვის საფუძველზე, ცხოველთა მუნიციპალურ თავშესაფარში გადაყვანილი იქნა ძაღლი, რომლის ბუნებრივი ლეტალობის დაფიქსირების შემდეგ, ცოფის ვირუსის გამოსავლენად, ცხოველის პათოლოგიური მასალა სოფლის მეურნეობის სამინისტროს ლაბორატორიაში გადაიგზავნა. მასალის კვლევის შედეგად, ცხოველში ცოფის ვირუსი დადასტურდა.