9 მაისს, ნაცისტურ გერმანიაზე გამარჯვების 70 წლისთავთან დაკავშირებით, საქართველოში მთელი რიგი ღონისძიებებია დაგეგმილი. ვეტერანები ტრადიციულად ვაკის პარკში უცნობი ჯარისკაცის საფლავთან შეიკრიბებიან, სადაც მათთვის დილის 10 საათზე კონცერტი გაიმართება. ვეტერანებს სიტყვით პრემიერ-მინისტრი იღაკლი ღარიბაშვილიც მიმართავს და თითოეულ მათგანს ერთჯერადად 1000-ლარიან დახმარებას გადასცემს. საქართველოს დღემდე მეორე მსოფლიო ომის 1719 ვეტერანი შემორჩა.

"ასლან აბაშიძის მმართველობის დამთავრების შემდეგ აჭარაში პროგრესი აშკარა იყო... ეს იყო პოზიტიური შედეგი, მაგრამ არასაკმარისი", - ამბობს "რეზონანსთან" საუბრისას ბათუმის მაჟორიტარი დეპუტატი მურმან დუმბაძე.

ექსპრეზიდენტი მიხეილ სააკაშვილი აცხადებს, რომ მოლდოვის პრემიერმა რეფორმატორთა ჯგუფი გაგზავნა სთხოვა, რათა კორუფციასთან ბრძოლასა და რეფორმების განხორციელების პროცესში დახმარება აღმოუჩინოს. "ნაცმოძრაობაში" ამაზე დეტალურ ინფორმაციას არ ფლობენ, თუმცა ამბობენ რომ ქართველ რეფორმატორთა მიმართ დაინტერესება სხვა ქვეყნებიდანაც ყოფილა, მათ შორის აფრიკიდან. მმართველ გუნდში კი ამას სააკაშვილის მორიგ ტყუილს უწოდებენ.

"პროფესიული სტანდარტებისა და ეთიკური ნორმების დაცვის დეფიციტია იმის მიზეზი, რომ ქართული მედია, რომელიც დღეს მნიშვნელოვნად არის პოლიტიკური ზეწოლისგან გათავისუფლებული, თავისუფალი მედიის სივრცეში ვერ ხვდება," - აცხადებს "რეზონანსთან" საუბრისას ჟურნალისტი და მედიაექსპერტი ზვიად ქორიძე.

იმის გამო, რომ გალში ე.წ. მესაზღვრეებმა ოკუპირებული აფხაზეთიდან ზუგდიდში გადმოსვლის უფლება სასწრაფოდ საოპერაციო ავადმყოფს არ მისცეს, 13 წლის გალელი ლევან ცაავა გარდაიცვალა. ეს შემთხვევა გუშინ მოხდა, თუმცა აფხაზეთის მთავრობაში აცხადებენ, რომ ეს პირველი შემთხვევა არ არის და ბოლო პერიოდში ოკუპირებული აფხაზეთიდან პაციენტების გადმოსვლა უკიდურესად იზღუდება. ორი წლის წინ ამ მიზეზით გალელი ფეხმძიმე ქალბატონიც დაიღუპა, ხოლო მისი ოჯახის წევრებს ამის გაპროტესტების გამო ფიზიკურად გაუსწორდნენ.

კანონის უხეში დარღვევით სამსახურიდან გათავისუფლებული 70 ადამიანი და პოლიტიკური ნიშნით გათავისუფლებული 23 მოქალაქე - ეს შედეგი აჩვენა საჯარო სკოლებისა და საგანმანათლებლო რესურსცენტრების თანამშრომელთა პოლიტიკური შეხედულებების გამო სამსახურიდან გათავისუფლების საკითხების შემსწავლელმა კომისიამ.

სამართალდამცველებმა საქართველოს 4 ქალაქის მასშტაბით - თბილისი, ქუთაისი, ბათუმი და ზუგდიდი - 40 პირი პორნოგრაფიული მასალის "გავრცელება-რეკლამირების" ბრალდებით დააკავეს. თუმცა იურისტთა ნაწილი საკანონმდებლო ხარვეზებზე ამახვილებს ყურადღებას და ფიქრობს, რომ შესაბამისი საკონონმდებლო ბაზის არარსებობის გამო ამ ადამიანების დაკავება სამართლებრივად გაუგებარია.

"უნდა მოვიფიქროთ, კიდევ რითი შეიძლება დასავლეთისათვის საჭიროები გავხდეთ," - ამბობს პოლიტოლოგი და ფსიქოლოგი რამაზ საყვარელიძე რიგის სამიტთან დაკავშირებულ მოლოდინზე საუბრისას და დასძენს, რომ ევროპას ახლა მნიშვნელოვანი პრობლემები აქვს და ჩვენთვის, მარტივად რომ ვთქვათ, არ სცხელა.

ქართულ ფეხბურთში მორიგი სკანდალია. შსს-ს თანამშრომლებმა გარიგებულ მატჩებში მონაწილეობისთვის 8 პირი დააკავეს, მათ შორის პირველი ლიგის ორი მოქმედი ფეხბურთელი, საფეხბურთო კლუბის პრეზიდენტი და ტოტალიზატორის წარმომადგენელი.

9 მაისს ვაკის პარკთან მისულ რუს ბაიკერებს ქართველი ბაიკერები დახვდებიან, რათა ისინი პარკში არ შეუშვან. საქართველოს მოტოკლუბის პრეზიდენტი ვახტანგ შენგელაია ამბობს, რომ ისინი ვეტერანებთან შეხვედრასა და უცნობი ჯარისკაცის საფლავზე მისვლას არ იმსახურებენ და ამით მხოლოდ და მხოლოდ ხალხს გააღიზიანებენ.

"რესპუბლიკელებისადმი" დადებითი განწყობის მიუხედავად "თავისუფალი დემოკრატები," პარლამენტში მთვარობისთვის ნდობის გამოცხადებას არ აპირებენ.

ქართულ-ამერიკული ერთობლივი სწავლებისთვის ამერიკული ჯავშანტექნიკა საქართველოში პირველად ჩამოვა. სამხედრო აღჭურვილობა ბულგარეთის საპორტო ქალაქ ვარნადან ვაზიანის საწვრთნელი ბაზისკენ უკვე დაიძრა. ამის შესახებ ინფორმაცია ნატოში აშშ-ის ოფიციალურმა წარმომადგენლობამ სოციალურ ქსელში გაავრცელა და თან ფოტოც დაურთო.