ახალი მთავარი პროკურორის არჩევა თუ მთავარი პროკურორის ხელახალი არჩევა - იუსტიციის მინისტრის თეა წულუკიანის მიერ გუშინ გაკეთებული განცხადება სხვადასხვაგვარად იქნა ინტერპრეტირებული.

უახლოეს მომავალში შინაგან საქმეთა სამინისტრო ორ უწყებად ჩამოყალიბდება. გომელაურის უწყებას უსაფრთხოების სამსახური გამოეყოფა, რომლის ხელმძღვანელსაც პარლამენტი 6 წლის ვადით აირჩევს და როგორც კანონშია ნათქვამი, იგი იქნება აპოლიტიკური და ანგარიშვალდებული როგორც მთავრობის, ასევე პარლამენტის წინაშე.

გუშინ დილით გორის რაიონის სოფელ აძვიდან რუსი ოკუპანტების მიერ გატაცებული ორი მოზარდი დღის მეორე ნახევარში გაათავისუფლეს. მთელი დღის ინტენსიური მოლაპარაკებების შედეგად შსს-ს ანალიტიკურმა დეპარტამენტმა და შიდა ქართლის სამხარეო პოლიციამ დაკავებული მოზარდების გათავისუფლება შეძლეს. ორივე არასრულწლოვანი ერგნეთის საგუშაგოს ტერიტორიაზე სამართალდამცავებს ოსურმა მხარემ გადასცა.

500-ლარიანი აქცია, რომელმაც დედაქალაქში საზოგადოების ნაწილში გარკვეული აჟიოტაჟი გამოიწვია, ორი დღეა მეტრო "თავისუფლებასთან" მიმდინარეობს. შეგახსენებთ, რომ ბოლო რამდენიმე კვირის განმავლობაში აქციის ორგანიზატორები თბილისის სხვადასხვა ნაწილში გამვლელებს სპეციალურ მოსაწვევებს ურიგებდნენ, სადაც ეწერა, რომ აქციაზე მისული ყველა მოქალაქე 500 ლარს მიიღებდა. თუმცა, როგორც "რეზონანსმა" ადგილზე გაარკვია, "თავისუფლებასთან" მისული მოქალაქეები მხოლოდ იმ შემთხვევაში მიიღებენ დაპირებულ თანხას, თუკი აქციის ორგანიზატორი პოლიტიკური გაერთიანება არჩევნებს მოიგებს და ხელისუფლებაში მოვა.

უამინდობის გამო რეგიონებში საგაზაფხულო სამუშაოების დაწყება გვიანდება. ყველაზე დიდი პრობლემაა დასავლეთ საქართველოში, სადაც მოსახლეობა მიწის დამუშავებას ვერ ახერხებს. ხვნის პროცესი მაისის ბოლომდე, ხოლო თესვა შუა ივნისამდე გადაიწევს.

თბილისში ოკუპირებული აფხაზეთის ყოფილი "პრეზიდენტი" მკურნალობს. საუბარია იმაზე, რომ ეს ექსპრეზიდენტი ალექსანდრე ანქვაბია, რომელმაც სულ ცოტა ხნის წინ მოსკოვში გულის ოპერაცია გაიკეთა - მას შუნტირება ჩაუტარეს, თუმცა მისი მდგომარება ძალიან დამძიმდა და ამიტომაც სასწრაფოდ თბილისში ჩამოიყვანეს.

აბაშიძე-კარასინის შეხვედრების ფორმატი ეკონომიკის სამინისტროების თითო წარმომადგენლის დამატებით ფართოვდება. შემდეგ შეხვედრაზე, რომელიც ივნისში გაიმართება, რუსული და ქართული მხარე ერთმანეთს სავარაუდოდ უკვე სამ-სამ კაციანი დელეგაციით შეხვება.

21-22 მაისს დაგეგმილ ევროკავშირის აღმოსავლეთ პარტნიორობის რიგის სამიტზე საქართველომ, მოლდოვამ და უკრაინამ, შესაძლოა, თანამშრომლობის ახალი მექანიზმი მიიღოს, თუმცა კონკრეტულად რა - ჯერჯერობით უცნობია. საგარეო საქმეთა მინისტრის ყოფილი მოადგილე ლევან ბოძაშვილი ამბობს, რომ ამის შესახებ რიგის სამიტის ფინალურ დეკლარაციაში ჩაიწერება. პრეზიდენტის მრჩეველი საგარეო ურთიერთობათა საკითხებში თენგიზ ფხალაძე კი დეკლარაციაზე საუბარს ნაადრევად მიიჩნევს და ამბობს, რომ ხელისუფლება მაქსიმალურად ეცდება ევროკავშირისგან დახმარების მიღებას.

ლაშა მახარაძის დედის, ნინო დიდებულიძის ინფორმაციით, მას შვილის მკვლელობის შემდეგ პარლამენტის ვიცე-სპიკერმა მანანა კობახიძემ ბოდიში მოუხადა. ბოდიში იმის გამო მოიხადა, რომ მახარაძის მკვლელობაში ბრალდებული გიორგი ოქროპირიძის შეწყალება მისი მონაწილეობით მოხდა.

შალვა ნათელაშვილს ყოფილი თანაპარტიელები უპირისპირდებიან. "მემარცხენე ალიანსის" ლიდერი სოსო შატბერაშვილი აცხადებს, რომ თავის დროზე "ლეიბორისტული" პარტია თანამებრძოლებთან ერთად იმის გამო დატოვა, რომ შალვა ნათელაშვილმა ათობით ათასი ევრო "ნაცმოძრაობისგან" მიიღო.

ევროპის ადამიანის უფლებათა სასამართლომ საქმეზე "იდენტობა" და სხვები საქართველოს წინააღმდეგ" გადაწყვეტილება მიიღო. საქმე 2013 წლის 17 მაისს თბილისში განვითარებულ მოვლენებს ეხება, რომელზეც სტრასბურგის სასამართლომ მომჩივანი მხარე გაამართლა და ხელისუფლებას მათთვის ზარალის ანაზღაურება ფინანსური კომპენსაციის სახით დააკისრა.

ინიციატივის, რომლის მიხედვითაც ბავშვების ქალაქგარეთ გაყვანისთვის სპეციალური რეგულაცია უნდა შემუშავდეს, ავტორი კულტურის მინისტრი მიხეილ გიორგაძეა. მინისტრის განცხადებით, უახლოეს პერიოდში სამუშაო ჯგუფი შეიკრიბება, რომელიც ბავშვების უსაფრთხოების სტანდარტის შემუშავებაზე იმსჯელებს. მისივე თქმით, იდეა ჯანდაცვის, სპორტისა და ახალგაზრდობის და განათლების მინისტრებს გაუზიარა.