ბოლო ორ თვეში ლომბარდებში მოთხოვნა გაორმაგდა, თუმცა მომხმარებლის გადახდისუნარიანობა 35-40%-ით შემცირდა. ლომბარდების მფლობელებისა და მენეჯერების განცხადებით, კლიენტთა უმეტეს ნაწილს პროცენტის გადახდაც უჭირს, რის გამოც ჩაბარებული ნივთების გაყიდვა უწევთ და ზარალზე მიდიან.

საქართველოს მოსახლეობის უმეტესობა მშობლიურ ქვეყანაში დასვენებას ვერ ახერხებს. სამთო და საზღვაო კურორტებზე აცხადებენ, რომ ადგილობრივი ტურისტების რაოდენობა წელს გაცილებით ნაკლებია, ვიდრე შარშან იყო. საოჯახო ტიპის სასტუმროების წარმომადგენელთა ინფორმაციით, ლარის გაუფასურებამ შიდა ტურიზმზე უარყოფითად იმოქმედა, რის გამოც უამრავ ადამიანს დასვენების შესაძლებლობა მოესპო.

საქართველოს სტატისტიკის ეროვნული სამსახურის მიერ გავრცელებული ინფორმაციით, შარშანდელთან შედარებით მოსახლეობის რიცხვი 761 ათასით არის შემცირებული. აღსანიშნავია, რომ ქვეყანაში საკმაოდ სწრაფი ტემპებით მიმდინარეობს მოსახლეობის დაბერების პროცესი. აშშ-ს აღწერების ბიუროს მონაცემებით, 2008 წელს მსოფლიოს ყველაზე დაბერებულ ქვეყნებს შორის საქართველო მე-14 ადგილზე იმყოფებოდა.

ნაყინის რამდენიმე სახეობაში ლისტერია მონოციტოგენეზი გამოვლინდა. რესპონდენტების უმეტესობა ფაქტს მშვიდად შეხვდა, რადგან მათთვის ეს შემთხვევა პირველი არ ყოფილა. მათი განმარტებით დარღვევები 2014-2013 წლებშიც ახსოვთ. ზოგიერთი მათგანი ფიქრობს, რომ პროდუქტს, რომელსაც ბავშვები მიირთმევენ მეტად უნდა აკონტროლებდნენ.

საბერძნეთიდან საქართველოში თანხის გადმორიცხვა აღდგა, თუმცა ფულის გადმოგზავნა ლიმიტირებულადაა შესაძლებელი. თვეში ერთ ადამიანს მხოლოდ 500 ევროს გადმოგზავნა შეუძლია, მაგრამ როგორც ქართველები ამბობენ, დღეს ამ 500 ევროს შოვნაც კი ძალიან ჭირს. ემიგრანტების თქმით, საბერძნეთის ეკონომიკურ-პოლიტიკურმა კრიზისმა მათ სოციალურ მდგომარეობაზეც იმოქმედა და იმათ, ვინც დღემდე სამსახური შეინარჩუნა, ბერძნებმა ხელფასი შეუმცირეს.

საქართველო ევროპელი და არა მხოლოდ ტურისტებისათვის ერთ-ერთი ყველაზე მიმზიდველი ქვეყანაა. რეიტინგულმა საერთაშორისო მედია საშუალება "თაიმ აუტმა" ინტერნეტმომხმარებლების მეშვეობით შეადგინა ევროპაში არსებული პოპულარული ტურისტული ადგილების ათეული. თბილისმა მეშვიდე ადგილი დაიკავა.

წელს უმაღლეს სასწავლებლებში სწავლას 28 053 აბიტურიენტი გააგრძელებს. ბიზნესის ადმინისტრირება, სამართალი და ეკონომიკური მიმართულებები - ეს ის პროფესიებია, რომლებიც ბოლო წლებია განსაკუთრებული პოპულარობით სარგებლობს.

სახალხო დამცველმა ქუჩაში მცხოვრები და მომუშავე ბავშვების უფლებების დაცვისთვის საჭირო ღონისძიებების გატარების შესახებ შინაგან საქმეთა სამინისტროს მიმართა და შესაბამისი რეკომენდაციებიც გადაუგზავნა.

უამინდობამ რეგიონებში სიმინდის მოსავალი გაანადგურა. განსაკუთრებით დიდი ზარალია სამეგრელოსა და გურიის მთიან ნაწილში, სადაც გვალვისგან ყანები მასიურად დაზიანდა. ადგილობრივ მუნიციპალიტეტებში აცხადებენ, რომ სიმინდის მოსავალი რეგიონებში 35-40%-ით შემცირდება.

დიდი ლილოს ტერიტორიაზე არსებული ნარჩენების პოლიგონი, ლილოსა და ახლომდებარე სოფლების მოსახლეობისთვის კვლავ გადაუჭრელ პრობლემას წარმოადგენს.

სამგორის მეტროსთან მდებარე ნავთლუღის ბაზარი მყიდველებისა და მოვაჭრეების სიმცირეს განიცდის. ფასების ზრდა სიიაფით განთქმულ ბაზარშიც შეიმჩნევა. მოვაჭრეები მყიდველის შემცირების მიზეზად ლარის გაუფასურებასა და გარემოვაჭრეებს ასახელებენ.

ბათუმში, გრიგოლეთში, ურეკში დამსვენებლები სანაპირო ზოლის სიბინძურეზე ჩივიან. ზოგიერთს აწუხებს წყლის პრობლემაც. მათი თქმით, შავ ზღვაში წელსაც ადვილი შესამჩნევია პოლიეთილენის ბოთლი, ცელოფანი, სიმინდის ტარო და ათასი ყოველდღიური მოხმარების ნივთი, თუ საკვები პროდუქტის ნარჩენები - არჩევანი დიდია. დამსვენებლების ნაწილს (განსაკუთრებით ეს ვლინდება ბავშვების შემთხვევაში) დიდი ძალისხმევის მიუხედავად სიბინძურისგან თავის არიდება უჭირს და იწამლებიან.